Jetisý oblysynda Naýryz meiramy keń kólemde atalyp ótildi. Merekelik sharalar óńirdiń barlyq aýdan-qalalaryn qamtydy. Taldyqorǵan qalasyndaǵy merekede Konstitýtsiia aýyly men biyl mereitoilyq jyly atalyp ótiletin tarihi tulǵalarǵa arnalǵan kiiz úiler sap túzdi. Taǵy bir atap óterlik ereksheligi sol, tsifrlyq kiiz úi qurylyp, zamanaýi tehnologiialyq alańda taldyqorǵandyqtar men qala qonaqtary óńirde júzege asyrylyp jatqan tsifrlyq jobalarmen, jańa sheshimdermen tanysty, dep habarlaidy Dalanews.kz
Jetisý oblystyq ákimdigi baspasóz qyzmetiniń málimetinshe kelýshilerdi merekemen jasandy intellekt arqyly adammen naqty ýaqyt rejiminde bailanys ornata alatyn zamanaýi gýmanoid robot quttyqtady. Sonymen qatar robot Qara jorǵa biin bilep, tamashalaýshylarǵa erekshe kóńil kúi syilady. Taǵy bir jańashyldyqty atap ótsek, osy kúni dron arqyly baýyrsaq jetkizildi.
Árbir kiiz úidiń janynda qazaq halqynyń salt-dástúri men mádenietin dáripteitin shaǵyn sahnalyq kórinister uiymdastyryldy. Turǵyndar án aityp, bi bilep, ulttyq kiimderin kórsetip, túrli oiyndar men saiystarǵa qatysty. Sonymen qatar altybaqan quryldy qonaqtarǵa Naýryz kóje men baýyrsaq usynyldy.
«Innovatsiia» kiiz úiinde kelýshilerdi zamanaýi gýmanoid robot qarsy alyp, Naýryz meiramy merekesimen quttyqtady. Robot sózdi uǵý, keńistikte baǵdarlaný, tepe-teńdik saqtaý, qozǵalysty úilestirý, qorshaǵan ortaǵa beiimdelý múmkindikterin kórsetti. Ol jasandy intellekt tehnologiialary arqyly adamdarmen erkin bailanys ornatty. Oǵan qosa robottalǵan sheshimder, sol qatarda robot-it te tanystyryldy. Bul qurylǵy patrýldeý, nysandardy tekserý, adamdardy súiemeldeý siiaqty mindetterdi atqara alady jáne adam úshin qiyn nemese qaýipti jaǵdailarda tiimdi jumys isteýge beiimdelgen.
3D LED-ekranda usynylǵan vizýaldy kontent zamanaýi tsifrlyq tehnologiialardyń qaýipsizdik, kólik, memlekettik qyzmetter men bailanys salalaryndaǵy kúndelikti ómirdi qalai jeńildetetinin aiqyn kórsetti.
Tsifrlyq kiiz úidiń janynda balalar tehnologiiany erte jastan meńgeretin robototehnikaǵa arnalǵan zamanaýi aýyl beinesindegi interaktivti alań uiymdastyryldy.
«Mádeniet» kiiz úiinde Kórkemsýret galereiasy qoryndaǵy ulttyq naqyshtaǵy sýretter qoiylyp, búl kartinalar QR-kod arqyly JI kómegimen jandandyrylyp, qozǵalysqa keltirildi. Sol siiaqty biyl mereitoilary atap ótiletin tarihi tulǵalardyń ómiri men qyzmeti týraly rolik kórsetildi.
Oqýshylar saraiynyń tárbielenýshi ónerli balalary merekelik kontsert usyndy. Sondai-aq balalardyń qolynan shyqqan túrli buiymdar kórmege qoiyldy.
Saiabaq mańyndaǵy sport alańdarynda ulttyq sport túrlerinen jarystar ótti. Sonymen qatar Taldyqorǵan qalasynda palýandar «Taldyqorǵan barysy» finaldyq saiysynda qazaq kúresinen baq synasty.
Sol siiaqty «Visit Zhetysu» týristik aqparattyq ortalyǵy uiymdastyrǵan kórmede óńirdiń týristik múmkindikteri men damý perspektivalary tanystyryldy. Is-shara óńirdiń shyǵarmashylyq ujymdary qatysqan Naýryz meiramynyń máni men mańyzyn ashatyn teatrlandyrylǵan qoiylymmen jalǵasyn tapty.
- Naýryz – jańarýdyń alǵysharty, jańǵyrýdyń basy, birlik pen kelisimniń jarshysy. Nuryn shashqan Naýryzben birge qaiyrymdylyq, janashyrlyq, tileýlestik, qorshaǵan ortaǵa jáne adamdardyń bir-birine degen qamqorlyǵy siiaqty barsha asyl qasietter eselene túsedi. Úlkenge qurmet, kishige izet, qoǵamǵa eńbek, elge qyzmet etýdiń úlgisi pash etiledi. Mundai igi sharalar Naýryzda ǵana emes, jyl boiy úzdiksiz jalǵasatyn qasterli qundylyqtarymyzǵa ainalýy tiis. Áz-Naýryz ár shańyraqqa qýanysh pen shattyq, yrys pen baq ákelsin, - dedi óńir basshysy.
Merekelik shara «Naýryz shashýy» atty kontsertpen qorytyndylandy.
Naýryzǵa Tekeli qalasynan kelgen búrkitshi Jasulan Búrkitbai óz pikirin bildirdi:
– Meniń ákem Faizýlla Búrkitbai qazaq halqynyń eń kóne ónerleriniń biri – qusbegilikpen ainalysady. Bul – tabiǵatqa degen tereń qurmetti, meiirimdilikti, tózimdilik pen sheberlikti talap etetin biregei dástúr. Ákemiz – bizge barlyq jaǵynan ustaz. Nemereleri de onyń isin jalǵastyryp keledi. Ótken jyldyń kúzinde «Qyran» respýblikalyq baiqaýynda bizdiń búrkitter bas júldeni jeńip aldy. Búgin biz eki búrkit pen bir qarshyǵamyzdy Naýryz merekesine orai uiymdastyrylǵan kórmege alyp keldik. Ózim qusbegilikten oblysta jattyqtyrýshymyn, jas urpaqtyń boiyna ulttyq sport túrlerine degen súiispenshilik pen qyzyǵýshylyqty darytýǵa tyrysamyn. Búrkitti qolǵa úiretý ońai emes, ol – rýhy myqty qus, sondyqtan ony kúshpen baǵyndyrý múmkin emes. Bul jerde sabyr kerek, tózim kerek. Men jastardy osyǵan úiretýge tyrysamyn, – dedi ol.
Jergilikti turǵyn Andrei Chýhan da oi qosty:
– Naýryz – bul bizdiń jalpyulttyq merekemiz. Jyl saiyn osy meiramǵa arnalǵan is-sharalarǵa qalmai, únemi qatysamyn. Óitkeni bul mereke kóktemniń kelgenin bildiredi, tabiǵat oianyp, kún uzaryp, jylylyq molaiady. Bizdiń tatýlyǵymyzdy, beibitshiligimiz ben birligimizdi pash etedi, bul – bizdiń ortaq bailyǵymyz. Biz jyl saiyn kóktemdi birge, tatý-tátti, kóńildi qarsy alamyz, elimizdiń mádeni murasy men dástúrlerin kórip bilip, tani túsemiz. Barshańyzǵa zor densaýlyq, úilerińizge molshylyq tileimin, – dedi ol.
Jalpy mereke keshkilik baǵdarlamamen jalǵasyp, kontsert pen otshashý bolady dep josparlanǵan.
Atap ótsek, Jetisý oblysynda Naýryz merekesi aiasynda 1330-dan astam túrli is-shara men aktsiialar uiymdastyryldy.
