Almaty qalasynda jol jumystarynyń sapasyn baqylaý nátijeleri týraly Óńirlik kommýnikatsiialar qyzmeti alańynda Jol aktivteri sapasynyń ulttyq ortalyǵynyń Almatydaǵy bólimshesiniń basshysy Maýlen Álipov baiandady. 2025 jyly Qalalyq mobildik basqarmasymen jáne qalanyń segiz aýdanynyń ákimdigimen jasalǵan kelisimsharttar aiasynda 509 inspektsiialyq tekserý júrgizilip, sonyń barysynda 1 385-ten astam jol-qurylys materialdarynyń úlgileri iriktelip, synaqtan ótkizildi, dep habarlaidy Dalanews.kz.
Spikerdiń aitýynsha, synaq nátijesi boiynsha 447 úlgi (32,2%) normativtik-tehnikalyq talapqa sai kelmegen. Tekserý barysynda 154 quqyq buzýshylyq anyqtalyp, olar boiynsha tiisti is-sharalar qabyldandy.
«Bizdiń negizgi mindetimiz – sapasyz istelgen jumysty qabyldap, aqysyn tóleýge jol bermeý. Saraptama qorytyndylarynyń nátijesinde merdiger uiymdar óz qarajaty esebinen shamamen 100 mln teńgeniń jumysyn qaita oryndady», – dep atap ótti Maýlen Álipov.
Sondai-aq ol tekserýdiń sońyna qarai Almaty qalasynyń Qala qurylysy baqylaý basqarmasyna 7 ótinish joldanǵanyn, bir merdiger uiymǵa 1,7 mln teńge kóleminde aiyppul salynǵanyn da habarlady.
Ortasha jóndeý jobalaryna saraptama júrgizýge erekshe nazar aýdaryldy. 2025 jyly Jol aktivteri sapasynyń ulttyq ortalyǵy qaladaǵy 300-den astam kósheni qamtityn 72 jobaǵa saraptama júrgizdi. Saraptama tehnikalyq qujattamanyń negizdiligin, durystyǵyn baǵalaýdy qamtidy.
«Sapaly jobalyq qujattama – joldardyń uzaq qyzmet etýiniń negizi. Dál osy kezeńde keiinnen jabynnyń qyzmet etý merzimine tikelei áser etetin parametrler qalyptasady», – dep atap ótti bólimshe basshysy.
Sonymen qatar Almatyda kóshe-jol jelisin diagnostikalaý jumysy da qyzý júrip jatyr. Biyl osy zamanǵy jyljymaly jol zerthanasynyń kómegimen 839 shaqyrym kóshede aspaptyq diagnostika júrgizildi. Keler jyly taǵy 2 257 shaqyrym jol jelisin tekserý josparlanyp otyr.
Spikerdiń aitýynsha, Qalalyq mobildik basqarmanyń málimeti boiynsha 2025 jyly Almatyda 300 shaqyrym jolǵa ortasha jóndeý júrgizilip, 35 shaqyrym jańa jol salynyp, 30 shaqyrym trotýar jóndeldi. Sonyń arqasynda joldyń jaǵdaiy 95%-ǵa jaqsaryp qaldy.
«Biz úlken infraqurylymdyq nysandardyń sapasyn da baqylaýda ustaimyz. Máselen, Seifýllin men Jansúgirov kóshesiniń qiylysyndaǵy kólik aiyryǵyn paidalanýǵa berý kezinde 8 tekserý júrgizilip, 18 synama alyndy, olardyń barlyǵy normativtik talaptarǵa sáikes boldy. Mundai nysandar úshin kepildik merzimi keminde 5 jyldy quraidy», – dep habarlady Maýlen Álipov.
Sonymen qatar qalada asfaltbeton jabyndaryn tóseýdiń jańa tásilderi qoldanyla bastady. Jol tóseminiń joǵary temperatýra men júktemege tózimdiligin arttyrý maqsatynda polimerlik qospalary bar eksperimenttik qospalar paidalanylyp, ǵylymi qaýymdastyqtyń qatysýymen gibridti asfaltbeton quramdaryn ázirleý jumysy júrgizilip jatyr.
«Sapany baqylap, jańa tehnologiialardy engizý jol infraqurylymyn uzaq ýaqytqa shydaityndai sapaly etedi», – dep qorytyndylady spiker.
