الماتى قالاسىندا جول جۇمىستارىنىڭ ساپاسىن باقىلاۋ ناتيجەلەرى تۋرالى وڭىرلىك كوممۋنيكاسيالار قىزمەتى الاڭىندا جول اكتيۆتەرى ساپاسىنىڭ ۇلتتىق ورتالىعىنىڭ الماتىداعى بولىمشەسىنىڭ باسشىسى ماۋلەن ءالىپوۆ باياندادى. 2025 جىلى قالالىق موبيلدىك باسقارماسىمەن جانە قالانىڭ سەگىز اۋدانىنىڭ اكىمدىگىمەن جاسالعان كەلىسىمشارتتار اياسىندا 509 ينسپەكسيالىق تەكسەرۋ جۇرگىزىلىپ، سونىڭ بارىسىندا 1 385-تەن استام جول-قۇرىلىس ماتەريالدارىنىڭ ۇلگىلەرى ىرىكتەلىپ، سىناقتان وتكىزىلدى، دەپ حابارلايدى Dalanews.kz.

سپيكەردىڭ ايتۋىنشا، سىناق ناتيجەسى بويىنشا 447 ۇلگى (32،2%) نورماتيۆتىك-تەحنيكالىق تالاپقا ساي كەلمەگەن. تەكسەرۋ بارىسىندا 154 قۇقىق بۇزۋشىلىق انىقتالىپ، ولار بويىنشا ءتيىستى ءىس-شارالار قابىلداندى.

«ءبىزدىڭ نەگىزگى مىندەتىمىز – ساپاسىز ىستەلگەن جۇمىستى قابىلداپ، اقىسىن تولەۋگە جول بەرمەۋ. ساراپتاما قورىتىندىلارىنىڭ ناتيجەسىندە مەردىگەر ۇيىمدار ءوز قاراجاتى ەسەبىنەن شامامەن 100 ملن تەڭگەنىڭ جۇمىسىن قايتا ورىندادى»، – دەپ اتاپ ءوتتى ماۋلەن ءالىپوۆ.

سونداي-اق ول تەكسەرۋدىڭ سوڭىنا قاراي الماتى قالاسىنىڭ قالا قۇرىلىسى باقىلاۋ باسقارماسىنا 7 ءوتىنىش جولدانعانىن، ءبىر مەردىگەر ۇيىمعا 1،7 ملن تەڭگە كولەمىندە ايىپپۇل سالىنعانىن دا حابارلادى.

ورتاشا جوندەۋ جوبالارىنا ساراپتاما جۇرگىزۋگە ەرەكشە نازار اۋدارىلدى. 2025 جىلى جول اكتيۆتەرى ساپاسىنىڭ ۇلتتىق ورتالىعى قالاداعى 300-دەن استام كوشەنى قامتيتىن 72 جوباعا ساراپتاما جۇرگىزدى. ساراپتاما تەحنيكالىق قۇجاتتامانىڭ نەگىزدىلىگىن، دۇرىستىعىن باعالاۋدى قامتيدى.

«ساپالى جوبالىق قۇجاتتاما – جولداردىڭ ۇزاق قىزمەت ەتۋىنىڭ نەگىزى. ءدال وسى كەزەڭدە كەيىننەن جابىننىڭ قىزمەت ەتۋ مەرزىمىنە تىكەلەي اسەر ەتەتىن پارامەترلەر قالىپتاسادى»، – دەپ اتاپ ءوتتى بولىمشە باسشىسى.

سونىمەن قاتار الماتىدا كوشە-جول جەلىسىن دياگنوستيكالاۋ جۇمىسى دا قىزۋ ءجۇرىپ جاتىر. بيىل وسى زامانعى جىلجىمالى جول زەرتحاناسىنىڭ كومەگىمەن 839 شاقىرىم كوشەدە اسپاپتىق دياگنوستيكا جۇرگىزىلدى. كەلەر جىلى تاعى 2 257 شاقىرىم جول جەلىسىن تەكسەرۋ جوسپارلانىپ وتىر.

سپيكەردىڭ ايتۋىنشا، قالالىق موبيلدىك باسقارمانىڭ مالىمەتى بويىنشا 2025 جىلى الماتىدا 300 شاقىرىم جولعا ورتاشا جوندەۋ جۇرگىزىلىپ، 35 شاقىرىم جاڭا جول سالىنىپ، 30 شاقىرىم تروتۋار جوندەلدى. سونىڭ ارقاسىندا جولدىڭ جاعدايى 95%-عا جاقسارىپ قالدى.

«ءبىز ۇلكەن ينفراقۇرىلىمدىق نىسانداردىڭ ساپاسىن دا باقىلاۋدا ۇستايمىز. ماسەلەن، سەيفۋللين مەن جانسۇگىروۆ كوشەسىنىڭ قيىلىسىنداعى كولىك ايىرىعىن پايدالانۋعا بەرۋ كەزىندە 8 تەكسەرۋ جۇرگىزىلىپ، 18 سىناما الىندى، ولاردىڭ بارلىعى نورماتيۆتىك تالاپتارعا سايكەس بولدى. مۇنداي نىساندار ءۇشىن كەپىلدىك مەرزىمى كەمىندە 5 جىلدى قۇرايدى»، – دەپ حابارلادى ماۋلەن ءالىپوۆ.

سونىمەن قاتار قالادا اسفالتبەتون جابىندارىن توسەۋدىڭ جاڭا تاسىلدەرى قولدانىلا باستادى. جول توسەمىنىڭ جوعارى تەمپەراتۋرا مەن جۇكتەمەگە توزىمدىلىگىن ارتتىرۋ ماقساتىندا پوليمەرلىك قوسپالارى بار ەكسپەريمەنتتىك قوسپالار پايدالانىلىپ، عىلىمي قاۋىمداستىقتىڭ قاتىسۋىمەن گيبريدتى اسفالتبەتون قۇرامدارىن ازىرلەۋ جۇمىسى جۇرگىزىلىپ جاتىر.

«ساپانى باقىلاپ، جاڭا تەحنولوگيالاردى ەنگىزۋ جول ينفراقۇرىلىمىن ۇزاق ۋاقىتقا شىدايتىنداي ساپالى ەتەدى»، – دەپ قورىتىندىلادى سپيكەر.