Almaty qalasynda qoǵamdyq kólikke bólinetin sýbsıdıa kólemi shamamen 460–470 teńge shamasynda. Bul týraly qalalyq máslıhat depýtaty Jalyn Jaınarbaı málimdedi, dep habarlaıdy Dalanews.kz.
Onyń aıtýynsha, sýbsıdıa kóleminiń ulǵaıyp ketpeýi úshin ol depýtat bolyp saılanǵan kezde “BUS/kılometr” júıesine kóshý týraly usynys jasaǵan.
“Basty maqsat – sýbsıdıa kólemin shekteı otyryp, kólik júıesin tıimdi etý. "BUS kılometr" júıesine kóshsek, qarjylandyrý naqty júrip ótken qashyqqa baılanysty esepteledi. Degenmen bul júıege kóshý kezinde bir-biriniń baǵytyn qaıtalaıtyn avtobýstar kóp, ol da bólek másele”, – deıdi depýtat.
Jaınarbaıdyń aıtýynsha, Almatyda transporttyq ınfraqurylym men kólik qańqasyn (transportnyı karkas) júıeli damytý mańyzdy. Osyǵan baılanysty ol qalalyq Mobıldilik basqarmasyn ekige bólý jóninde usynys bildirgen.
“Bıyl jańa ákim kelgennen keıin basqarma ekige bólindi: biri – kólik, ekinshisi – jol baǵyty boıynsha. Bul óte durys sheshim boldy. Qazir transport salasyna kelgen jańa basshy osy salany jaqsy biletin adam sıaqty. Ol biraz tıimdi ıdeıalaryn aıtty, eger sol josparlar júzege assa, qaladaǵy kólik júıesinde aıtarlyqtaı ózgeris bolady”, – dedi ol.
Depýtattyń aıtýynsha, qazirgi tańda sýbsıdıa kólemi aıtarlyqtaı joǵary bolǵanymen, qala turǵyndary úshin qoǵamdyq kólik júıesiniń qolaılylyǵy áli de jetkiliksiz.
“Eger transporttyq karkas jospary tıimdi iske assa, sýbsıdıa óz ózin aqtaıtyn deńgeıge jetedi dep senemiz”, – dep túıindedi máslıhat depýtaty Jalyn Jaınarbaı.
Eske sala ketsek, buǵan deıin Energetıka mınıstrliginiń burynǵy keńesshisi, sarapshy Oljas Baıdildınov tasymaldaýshylar shyǵynmen jumys istep jatqanyn aıtyp, avtobýs bıleti kem degende 500 teńge bolýy tıis degen pikir bildirgen edi.
Sarapshynyń bul pikirine Úkimet túsinikteme berdi.
Ulttyq ekonomıka birinshi vıse-mınıstri Azamat Ámrınniń aıtýynsha, baǵanyń ósýi tek obektıvti sebepter bolǵan jaǵdaıda ǵana múmkin.
"Mysaly, eger benzın qymbattasa. Biraq bul ár kompanıanyń komersıalyq sheshimi, memleket tarapynan bekitilgen norma emes", – dedi ol.
Al Qarjy vıse-mınıstri Erjan Birjanov sarapshynyń pikiri onyń jeke kózqarasy ekenin aıtyp, bılik tarapynan jolaqynyń kúrt qymbattaýyna jol berilmeıtinin málimdedi.
"Qoǵamdyq kólik – halyqqa arnalǵan. Sondyqtan jolaqynyń kúrt ósýine jol berilmeıdi. Eger qoǵamdyq kóliktegi baǵalar ósse, memleket bul baǵytta qoldaý kórsetedi", – dedi ol.
