Almaty oblysynyń Jambyl aýdanyndaǵy Qarǵaly aýylynda birneshe adam jetim oqýshy qyzdy zorlaǵan, dep habarlaidy Dalanews.kz.
Onymen qoimai olar qyz balany zorlaǵanyn videoǵa túsirip, internetke taratyp jibergen. Ata-analardyń sózinshe, bul oqiǵany ótken aptadan beri jaýyp tastamaq bolǵan.
Jambyl aýdanynyń bilim bólimi bul jaitqa qatysty pikir bildirdi. Vedomstvo málimetinshe, mektep direktory kámeletke tolmaǵandardyń qatysýymen bolǵan oqiǵa týraly derekti dereý habarlaǵan.
Qazirgi ýaqytta Qarǵaly aýylynda orta mektep oqýshylarynyń qatysýymen bolǵan oqiǵa boiynsha tergeý júrgizilip jatyr.
Jambyl aýdanynyń bilim bólimi taratqan aqparatqa sáikes, mektep direktory 2025 jyldyń 13 qazanynda 2025 jyldyń 21 qyrkúieginde, jeksenbi kúni, sabaq ýaqyty men mektep aýmaǵynan tys, jeke úide kámeletke tolmaǵandardyń qatysýymen oqiǵa bolǵanyn bilgen. Bul týraly habardar bolǵan soń, direktor dereý quqyq qorǵaý organdaryna aqparat bergen.
Atalǵan derek boiynsha tergeý organdary QR Qylmystyq kodeksiniń 124-babynyń 1-bóligi boiynsha qylmystyq is qozǵady. Qazir oqiǵanyń barlyq mán-jaiyn anyqtaýǵa baǵyttalǵan qajetti tergeý amaldary júrgizilip jatyr.
Oqýshylarmen jeke profilaktikalyq jáne túsindirý jumystary atqarylýda. Oblystyq psihologiialyq qoldaý ortalyǵynyń mamandary zardap shekken jasóspirimge kómek kórsetip jatyr.
"Mektep direktory durys áreket etti, ol politsiiaǵa dereý habarlaýǵa mindetti bolatyn. Qazir tergeý organdary qylmystyq is qozǵady, barlyq derek anyqtalady. Degenmen, biz qoǵamdy jalǵan aqparat taratpaýǵa jáne balalarǵa qatysty taqyryptardy haipqa ainaldyrmaýǵa shaqyramyz. Balanyń taǵdyry men jaǵdaiy bárinen mańyzdy", – dedi Jambyl aýdanynyń bilim bólimi basshysy Svetlana Altynbekova.
Aita ketý kerek, QR Qylmystyq-protsestik kodeksiniń 201-babyna sáikes, prokýrordyń ruqsatynsyz sotqa deiingi tergeý derekterin jariia etýge tyiym salynady. Al QR Qylmystyq kodeksiniń 423-baby mundai buzýshylyq úshin qylmystyq jaýapkershilikti qarastyrady. Sonymen qatar, Qylmystyq kodekstiń 274-babynda qoǵamdyq tártipti buzý nemese eleýli ziian keltirý qaýpin týdyratyn jalǵan aqparat taratqandarǵa jaýapkershilik kózdelgen.
