"Qazgidromet" RMK 15 qazan kúni Aqtaý, Almaty jáne Óskemen qalalarynda qolaisyz meteorologiialyq jaǵdailar (QMJ) bolatynyn málimdedi, dep habarlaidy Dalanews.kz.
Mamandardyń aitýynsha, QMJ – bul ziiandy zattardyń atmosferanyń tómengi qabatynda jinalýyna yqpal etetin tabiǵi qubylys. Mundai jaǵdai tynysh aýa raiy, álsiz jel, tuman jáne inversiia siiaqty meteofaktorlardyń áserinen qalyptasady.
"Qolaisyz meteojaǵdai kezinde eldi mekenderde aýa sapasy nasharlap, bul halyqtyń densaýlyǵyna keri áser etýi múmkin", – dep eskertti "Qazgidromet" ókilderi.
Sinoptikterdiń túsindirýinshe, atmosferalyq aýanyń lastaný deńgeiine eń aldymen jeldiń baǵyty men jyldamdyǵy, jaýyn-shashyn, aýa temperatýrasy men ylǵaldylyq siiaqty sinoptikalyq faktorlar yqpal etedi.
Ekologtar turǵyndarǵa osyndai kúnderi dalada uzaq ýaqyt bolmaýǵa, al sozylmaly aýrýlary bar azamattarǵa saqtyq sharalaryn kúsheitýge keńes beredi.
