2024 jyly alǵash ret "Bolashaq" halyqaralyq stıpendıasyna jáne "500 ǵalym" ǵylymı taǵylymdamasyna qujattardy qabyldaý úzdiksiz júrgiziletin bolady. Qujattardy qabyldaý 29 sáýirge josparlanǵan jáne 25 qazanda aıaqtalady, - dep habarlaıdy Dalanews.kz.
Konkýrstyq irikteý 2024 jylǵy 10 mamyrdan 30 qarashaǵa deıin ótedi. "Bolashaq" stıpendıasyna qujattar egov.kz. portaly arqyly qabyldanady "500 ǵalym" boıynsha ótinimderdi qabyldaý jáne konkýrstyq irikteý alǵash ret bolashak.gov.kz. portalynda "Úmitkerdiń jeke kabıneti" bóliminde onlaın júrgiziledi. Shetelde kadrlar daıarlaý kezinde basymdyq ınjenerlik-tehnıkalyq jáne medısınalyq mamandyqtarǵa beriledi.
2024 jyly "Bolashaq" baǵdarlamasy boıynsha oqý úshin 555 stıpendıa bólindi. Onyń ishinde 395 stıpendıa magıstratýra jáne rezıdentýra, doktorantýra baǵdarlamalary boıynsha – 50 stıpendıa, taǵylymdamadan ótý úshin - 110 stıpendıa bólindi.
Basym mamandyqtar tizbesi ortalyq jáne jergilikti memlekettik organdardyń ótinimderi, qysqa merzimdi jáne uzaq merzimdi damý strategıalary men josparlary boıynsha qalyptastyryldy. Úmitkerler sý qaýipsizdigi jáne sý burý, agroorman sharýashylyǵy, qurylys, AÓK, jasandy ıntellekt, molekýlalyq genetıka jáne t. b. sıaqty ózekti mamandyqtar boıynsha shetelde daıyndyqtan óte alady.
"Bolashaq" stıpendıasy boıynsha kvotalyq sanattar qarastyrylǵan. Olar ınjenerlik-tehnıkalyq qyzmetkerler, medısınalyq mamandar jáne aýyldyq jerlerden kandıdattar. Kvotalyq sanattaǵy úmitkerler tegin tildik daıyndyqtan óte alady, sondaı-aq qujattardy tapsyrý kezinde sheteldik joǵary oqý ornyna óz betinshe túsýdiń qajeti joq. Olar stıpendıa taǵaıyndalǵannan keıin oqý ornyn tańdaı alady.
"500 ǵalym" baǵdarlamasy álemniń jetekshi ǵylymı ortalyqtarynda qazaqstandyq ǵalymdardyń biliktiligin arttyrý maqsatynda Memleket basshysynyń tapsyrmasyna sáıkes bekitildi. Ǵylymı taǵylymdamalar baǵdarlamasy boıynsha jyl saıyn 500 stıpendıa bólinedi.
Memleket akademıalyq oqýǵa, taǵylymdamadan ótýge, ushýǵa, medısınalyq saqtandyrýǵa, vızalyq alymdarǵa, oqý materıaldaryn satyp alýǵa jumsalatyn shyǵyndardy jabady, sondaı-aq aı saıynǵy stıpendıa tólenedi.
Úmitkerlerge qoıylatyn talaptarmen, basym mamandyqtar tizbesimen, ýnıversıtetter men ǵylymı ortalyqtardyń tizimimen bolashak.gov.kz. saıtynda tanysýǵa bolady.
