Tarbaǵatai aýdanynda bolashaqta jańa ken orny ashylady
Jańadan ashylatyn Qyzylqaiyń ken ornynda búgingi tańda barlaý jumystary júrgizilýde.
Aldaǵy jyldary jobalaý jáne qurylys jumystaryn bastaý josparlanyp otyr, dep habarlaidy Dalanews.kz Altainews.kz-ke silteme jasap.
Aýdan ákimi Darhan Jórgekbaevtyń aitýynsha, qurylys jumystaryna 3000 adam jumysqa tartylady degen boljam bar, sonymen qatar nysan jobalyq qýatyna engen kezde turaqty jumyspen 1500 adam qamtamasyz etiledi dep kútilýde. Alaida qurylystyń bastalýyna birneshe másele kedergi jasap otyr.
- Búgingi kúni ken orynyn ashýǵa basty kedergilerdiń biri - elektr qýatynyń jetispeýi. Sondyqtan syrttan 50 mgvatt elektr qýatyn ákelý josparlanýda,- dedi aýdan ákimi.
Aýdanda Bentonit ken orny jumys istep tur. Ken ornynda qazirgi kúni 70 adam eńbek etip jatyr. Bentonit ken oryndarynyń negizgi investory byltyr aýysqan. Jańa investormen birlesip naqty is-sharalar jospary daiyndalýda. Jospar boiynsha ken orny ulǵaiyp, qosymsha jumys oryndary ashylýy tiis.
Aýdan mal jáne balyq sharýashylyǵyn negizgi kásip etken ólke. Alaida Tarbaǵatai aýdany dotatsiialyq, iaǵni menshikti kiris kózi óziniń qajettilikterine jetpeitin aýdan bolyp tabylady. Joǵaryda atalǵan jumystardyń basym kópshiligi oblystyq jáne respýblikalyq biýdjetten qarjylandyrylǵan. Aýdannyń áleýeti damýy úshin jergilikti túsimniń kólemi artýy qajet. Sondyqtan Qyzylqaiyń siiaqty kásiporyndardyń ashylǵany óte mańyzdy. Iri kásiporyndardyń ashylýy jańa jumys oryndarymen qatar, salyq túsimderiniń artýyna, aýdannyń ekonomikalyq damýyna oń yqpal etedi.
- Oǵan qosa aýdan turǵyndarynyń negizgi tabys kózi bolyp otyrǵan mal jáne balyq sharýashylyǵyn damytýǵa jumys atqarýdamyz. Búgingi tańda zamanaýi balyq zaýytyn salý boiynsha investordy anyqtap, kelissózder júrgizýdemiz. Sonymen qatar, aýdanda et kombinatyn salý boiynsha tehnikalyq ekonomikalyq negizdemelerdi jasap, investorlardy izdestirýdemiz, - dep atap ótti Darhan Jórgekbaev.
Aldaǵy ýaqytta Resei-Qytai mýltimodaldi tranzittik dáliz iske qosylyp, Qyzylqaiyń ken oryny ashylsa, Bentonit ken orny keńeitilse, balyq jáne et zaýyttary salynsa, aýdan turǵyndaryna da jańa múmkindikter paida bolyp, mýltiplikativtik áser beretini sózsiz.
Kásiporyndardyń qyzmetkerlerin azyq-túlikpen, kiim-keshekpen, taǵy da basqa qajettiliktermen qamtamasyz etý aýdan turǵyndarynyń enshisinde bolmaq. Bul degenimiz, aýdanymyzdyń naýbaihanalaryna, aspazshylaryna, tiginshilerine jańa naryq ashylady degen sóz, - dedi aýdan ákimi.
