Qyrǵyzstannyń kókpar federatsiiasy qazaqstandyq tarapty taǵy bir sheshýshi oiynǵa shaqyrdy, - dep habarlaidy Dalanews.kz.
Qyrǵyzstan tarapy 1 qarashada Ystyq-Kólde Kelisim kýbogyn ótkizýge shaqyrdy. Qazaqstan tarapyna shaqyrtý haty búgin jiberilgen.
"1 qarashada kókbóri jáne kókpardy sol qurammen oinaýǵa shaqyramyz. Bul - sport, oiyn eki halyq arasyndaǵy alaýyzdyqty týdyrmaýy kerek. Biz halyqtarymyzdyń kelisimi úshin óz ambitsiialarymyzdan bas tartýǵa daiynbyz. Sýdia basqa elden bolady", - deidi kókbóri federatsiiasynyń basshysy Ramis Djýnýsaliev.
Eske salaiyq, 12 qyrkúiekte Dúniejúzilik kóshpendiler oiyndarynda týrnirdiń finalynda Qyrǵyzstan men Qazaqstan quramalarynyń kókparshylary jappai tóbelese jazdaǵan bolatyn.
"Ulysmedia" málimetinshe, birinshi taimnyń sońyna 6 minýt qalǵanda 1:3 esebimen Qyrǵyzstan quramasy alǵa shyqqan. Osydan keiin janjal bastalyp ketti. Sportshylar birin-biri qamshymen urdy. Keiin politsiia kelip, olardy ajyratty. Final ýaqytsha toqtatyldy. Qos tarap sabyrǵa kelip, keiinnen oiyn jalǵasty.
Massaget.kz málimetinshe, oiyn nátijesi boiynsha, Qazaqstan ulttyq quramasy top jardy. Otandastarymyz finalda qyrǵyz shabandozdaryn utty.
Ekinshi kezeńde Qazaqstan quramasy esepti teńestirip qana qoimai, 4:3 esebimen alǵa ozǵan. Alaida qyrǵyzdar oiyn aiaqtalar tusta salym salyp, nátijeni teńestirip ketti.
Qosymsha ýaqyttaǵy saiysta 5:4 esebimen Qazaqstan quramasy jeńiske jetti.
"Kóshpendiler oiyndarynyń oqý-jattyǵý jiynyn jyl basynda bastadyq. Eldi qýantamyz degen maqsatymyz bolǵan edi. Qyrǵyz aǵaiyndarmen kezdesý qiyn bolady degen edim. Rasynda solai boldy. Dese de el namysyn qoldan bermei, úmitti aqtadyq", – dedi kókpardan ulttyq quramanyń bas bapkeri Aqylbai Mankeev.
Qyrǵyzstandyq sportshylar marapat aiaqtalǵanyn kútpei tribýnadan ketip qaldy.
