قىرعىزستاننىڭ كوكپار فەدەراسياسى قازاقستاندىق تاراپتى تاعى ءبىر شەشۋشى ويىنعا شاقىردى، - دەپ حابارلايدى Dalanews.kz. 

قىرعىزستان تاراپى 1 قاراشادا ىستىق-كولدە كەلىسىم كۋبوگىن وتكىزۋگە شاقىردى. قازاقستان تاراپىنا شاقىرتۋ حاتى بۇگىن جىبەرىلگەن. 

"1 قاراشادا كوكبورى جانە كوكپاردى سول قۇراممەن ويناۋعا شاقىرامىز. بۇل - سپورت، ويىن ەكى حالىق اراسىنداعى الاۋىزدىقتى تۋدىرماۋى كەرەك. ءبىز حالىقتارىمىزدىڭ كەلىسىمى ءۇشىن ءوز امبيسيالارىمىزدان باس تارتۋعا دايىنبىز. سۋديا باسقا ەلدەن بولادى"، - دەيدى كوكبورى فەدەراسياسىنىڭ باسشىسى راميس دجۋنۋسالييەۆ. 

ەسكە سالايىق، 12 قىركۇيەكتە دۇنيەجۇزىلىك كوشپەندىلەر ويىندارىندا ءتۋرنيردىڭ فينالىندا قىرعىزستان مەن قازاقستان قۇرامالارىنىڭ كوكپارشىلارى جاپپاي توبەلەسە جازداعان بولاتىن.

"ۇلىسمەديا" مالىمەتىنشە، ءبىرىنشى تايمنىڭ سوڭىنا 6 مينۋت قالعاندا 1:3 ەسەبىمەن قىرعىزستان قۇراماسى العا شىققان. وسىدان كەيىن جانجال باستالىپ كەتتى. سپورتشىلار ءبىرىن-بىرى قامشىمەن ۇردى. كەيىن پوليسيا كەلىپ، ولاردى اجىراتتى. فينال ۋاقىتشا توقتاتىلدى. قوس تاراپ سابىرعا كەلىپ، كەيىننەن ويىن جالعاستى.

Massaget.kz مالىمەتىنشە، ويىن ناتيجەسى بويىنشا، قازاقستان ۇلتتىق قۇراماسى توپ جاردى. وتانداستارىمىز فينالدا قىرعىز شاباندوزدارىن ۇتتى. 

ەكىنشى كەزەڭدە قازاقستان قۇراماسى ەسەپتى تەڭەستىرىپ قانا قويماي، 4:3 ەسەبىمەن العا وزعان. الايدا قىرعىزدار ويىن اياقتالار تۇستا سالىم سالىپ، ناتيجەنى تەڭەستىرىپ كەتتى. 

قوسىمشا ۋاقىتتاعى سايىستا 5:4 ەسەبىمەن قازاقستان قۇراماسى جەڭىسكە جەتتى.

"كوشپەندىلەر ويىندارىنىڭ وقۋ-جاتتىعۋ جيىنىن جىل باسىندا باستادىق. ەلدى قۋانتامىز دەگەن ماقساتىمىز بولعان ەدى. قىرعىز اعايىندارمەن كەزدەسۋ قيىن بولادى دەگەن ەدىم. راسىندا سولاي بولدى. دەسە دە ەل نامىسىن قولدان بەرمەي، ءۇمىتتى اقتادىق"، – دەدى كوكپاردان ۇلتتىق قۇرامانىڭ باس باپكەرى اقىلباي مانكەيەۆ.

قىرعىزستاندىق سپورتشىلار ماراپات اياقتالعانىن كۇتپەي تريبۋنادان كەتىپ قالدى.