Aqyn, Májilis depýtaty Rinat Zaiytov Qazaqfilm men áskerdegi bylyqqa qatysty ashyq pikir bildirdi, - dep habarlaidy Dalanews.kz.
Depýtattyń sózinshe, qazir maqsatty túrde Qazaqfilmdi qurtý operatsiiasy júrgizilip jatyr.
«Sháken Kenjetaiuly Aimanov atyndaǵy qara shańyraq Qazaqfilmdi qurtý protsesi sanaly túrde, ádeii júrip jatyr. Bul, qatelespesem, Ahmetjan Esimovtiń be, Baýyrjan Baibektiń be kezinde bastaldy. Qazaqfilmniń turǵan jerin bilesiz, qalanyń qaq ortasy. Bular sol jerdi alǵysy kelip otyr. Saýda úiin be, birdeńe salǵysy kelgen sasyq armandary bar. Bes gektaryn alyp aldy. Endi qalǵanyn qurtqaly otyr. Áitpese Qazaqfilm degenińiz kezinde 2000-ǵa jýyq shtaty bar, qanshama materialdyq bazasy bar, bálenbai pavilony jumys istep turǵan úlken ujym edi. Qazir 150-dei adam shtatta qaldy. Segiz pavilonnyń bireýi ǵana istep tur ǵoi deimin. Segizi isteitin bolsa, Qazaqfilm óz kúnin ózi kóre alatyn jer edi.
Qazaqfilm memleketten qarjylanbaidy. Bul Arystanbek Muhamediuly degen myrzanyń jasap ketken qastyǵy. Ol «Kino qory» degendi qurdy da, búkil memlekettiń aqshasyn sonda aýdarady, Qazaqfilmge jylyna eki-aq filmge ruqsat etiledi. Al animatsiialyq mýltfilm túsirýge múldem ruqsat etilmeidi. Sondai qaýly shyǵaryp tastaǵan. Ótkendegi animatorlardyń zar jylap júrgeni - sol.
Azamat myrzanyń jumystan ketýi, meniń túsingenim, ol bul jumystyń nátijesiz bolatynyn túsindi de, «Qazaqfilm meniń tusymda qurydy degen sózge qalǵym kelmeidi» dep sharasyzdyqtan ketken siiaqty. Bálkim, qatelesýim múmkin. Tek ózimniń boljamym. ...Urpaqtyń aldynda uiatty bolmaý úshin, arýaqtyń aldynda kináli bolmaý úshin Qazaqfilmdi saqtap, bir arqasynan qaǵyp jibersek, ary ketse úsh jylda tabys tabatyn deńgeige jete alady», - dedi depýtat «Qasqa jolǵa» suhbatynda.
Rinat Zaiytov keiingi kezde áskerde bolyp jatqan bylyqtarǵa qatysty da pikir bildirdi. Onyń sózinshe, máseleni sheshýdiń bir joly – sheneýniktiń balasyn áskerge jiberý.
«Memleketke eń birinshi shekarany, irgeni bútindeý kerek. Ony qorǵaityn – áskeri adamdar. ...Bizge ásker kerek. Qajet bolatyn bolsa, baiaǵy siiaqty eki jyl qylsyn. Áskerdi túzeý úshin ne isteý kerek degen suraqqa bir-aq jaýap beretin edim. Ákimder, depýtattar, ministrlerdiń balalaryna áskerge barýdy mindetteý kerek. Bir oblys ákiminiń balasy bir áskeri bólimde júrse, ol bólimde «bardak» bolmaidy.
...Áskerge baryp jatqan – ashynǵan daýysy estilmeitin aýyldyń balalary. Jańaǵylardyń balalary barsa, mynadai bolmaityn edi», - dedi Zaiytov suhbatynda.
