Astanada Otan qorǵaýshylar kúnine orai Óner mýzeii bazasynda Saǵadat Nurmaǵambetov atyndaǵy áskeri kolledj kýrsanttaryna tanymdyq kezdesý uiymdastyryldy. Is-shara barysynda olarǵa sirek kezdesetin ulttyq mýzykalyq aspaptar týraly málimet aityldy, dep habarlaidy dalanews.kz.
Kýrsanttarǵa qaita qalpyna keltirilgen jáne sirek mýzykalyq aspaptardyń túpnusqasy qoiylǵan kórme kórsetildi. Onyń ishinde áskeri joryqtarda qoldanylǵan «joryqtyq» aspaptar da bar.
Qonaqtarǵa olardyń áýeni tyńdatylyp, mýzykanyń áskeri áreketter men salt-joralǵylarda qalai paidalanylǵany túsindirildi.
Kórmeniń negizgi eksponattarynyń biri – kernei. Bul ejelgi úrmeli aspap túrki halyqtary arasynda keń taralǵan.
Ejelde kernei tek mýzykalyq qural ǵana emes, sonymen qatar belgi berý qyzmetin atqarǵan: onyń kómegimen áskeri buiryqtar jetkizilip, sarbazdar jinalǵan, sondai-aq handar men qolbasshylardy qarsy alý, báigeler men sherýler siiaqty saltanatty rásimder súiemeldengen.
Is-shara aiasynda kóne aspaptarda mýzykalyq shyǵarmalar oryndalyp, kýrsanttarǵa olardyń shyǵý tegi, qoldanylý erekshelikteri men mádeni róli týraly aityldy.
Uiymdastyrýshylar mundai kezdesýler bolashaq áskeri qyzmetshilerdiń patriottyq rýhyn nyǵaitýǵa jáne tarihi-mádeni tanymyn keńeitýge baǵyttalǵanyn atap ótti.
Sonymen qatar, mundai is-sharalar áskeri dástúr men mádeni muranyń bailanysyn kórsetip, jastardyń el tarihy men ulttyq qundylyqtarǵa degen qurmetin qalyptastyrady.
