Qyzylorda oblysynda Qazaqstan Respýblikasynyń Ulttyq Ǵylym akademiiasy Prezidiýmynyń kóshpeli otyrysy bastaldy. Eki kúnge josparlanǵan otyrystyń alǵashqy kúni «Óńirlik damýdyń basym baǵyttary» taqyrybynda ǵylymi sessiia uiymdastyryldy, dep habarlaidy dalanews.kz.
Sessiiaǵa Ulttyq ǵylym akademiiasynyń basshylyǵy, elimizdiń jetekshi jáne jergilikti ǵylymi-zertteý uiymdarynyń jáne joǵary oqý oryndarynyń ǵalymdary, sondai-aq óndiris jáne biznes qurylymdarynyń ókilderi qatysty.
Is -sharanyń maqsaty óńirdiń áleýmettik-ekonomikalyq damýyna serpin beretin ǵylymi sheshimder men innovatsiialyq tehnologiialardy talqylaý, sondai-aq ǵylym men óndiris arasyndaǵy bailanysty nyǵaitý.
Sessiiany ashqan Qyzylorda oblysy ákiminiń orynbasary A.Zebeshev kirispe sóz sóilep, óńir damýynyń ǵylymmen tikelei bailanysty ekenin atap ótip, tabiǵi resýrstardy tiimdi paidalaný, ekologiialyq máselelerdi sheshý jáne ekonomikany ártaraptandyrýda ǵylymi qaýymdastyqpen tyǵyz yntymaqtastyqtyń mańyzyn aitty.
Ǵylymi sessiia barysynda óńirlik damýdyń ózekti máselelerine arnalǵan baiandamalar usynyldy. QR Prezidentiniń janyndaǵy Ulttyq ǵylym akademiiasynyń vitse-prezidenti E. Shevchenko Qazaqstandaǵy ǵylymnyń forsaittyq damýy men óńirlik forsait-jelilerdi qalyptastyrýdyń mańyzyna toqtaldy.
Qorqyt ata atyndaǵy Qyzylorda ýniversiteti ǵylymi jumystar jáne halyqaralyq bailanystar jónindegi prorektory M. Bóribaeva jahandyq máselelerge baǵyttalǵan jergilikti sheshimderimen tanystyrdy.
Ekologiialyq ahýal, ásirese Aral óńirindegi jaǵdai, ǵylymi sessiianyń negizgi talqylaý taqyryptarynyń biri boldy.
«Geografiia jáne sý qaýipsizdigi institýty» AQ ǵalymy M. Tshai Aral teńizi óńiriniń ekologiialyq daǵdarys aimaǵy retindegi ózekti problemalaryn kóterdi. Al Satbayev University ǵylymi qyzmetkeri Ý. Jantikeev sýdy tazartý jáne topyraqty bioremediatsiialaýdyń zamanaýi integratsiialanǵan tehnologiialaryn usyndy.
Bul baǵyttar óńirdiń ekologiialyq turaqtylyǵyn arttyrýǵa jáne halyqtyń ómir súrý sapasyn jaqsartýǵa yqpal etedi.
«Qazaq qaita óńdeý jáne tamaq ónerkásibi ǵylymi-zertteý institýty» JShS-niń bas ǵylymi qyzmetkeri D. Daýtkanova astyqty ónerkásiptik óńdeýdiń mýltiplikativtik áserine toqtalsa, «Polimerlik materialdar jáne tehnologiialar institýty» direktorynyń orynbasary M. Saǵyndyqov pen institýttyń ǵylymi qyzmetkeri I. Gýsenov ken oryndaryn tiimdi igerý jáne sý aǵyndaryn basqarý baǵytyndaǵy innovatsiialyq tásilderdi tanystyrdy.
Sondai-aq, «Balyq sharýashylyǵy ǵylymi-óndiristik ortalyǵy» JShS bas direktorynyń orynbasary T. Baraqbaev Aral-Syrdariia basseininde taýarly balyq ósirý tehnologiialaryn jetildirýdiń ǵylymi negizderin baiandady.
Agrarlyq ǵylymnyń basym baǵyttary týraly «Y. Jahaev atyndaǵy Qazaq kúrish sharýashylyǵy ǵylymi-zertteý institýty» JShS Basqarma tóraǵasynyń orynbasary J.Baimanov baiandama jasap, aýyl sharýashylyǵyn damytýǵa baǵyttalǵan jobalarmen tanystyrdy.
Sý resýrstaryn utymdy paidalaný máselesi sessiia barysynda airyqsha nazarǵa alyndy.
Qyzylorda qalasyn jer asty sýlary arqyly sýmen qamtamasyz etý múmkindikteri týraly Ý. Ahmedsafin atyndaǵy Gidrogeologiia jáne geoekologiia institýtynyń ǵalymy D. Saparǵaliev baiandap ótti.
Ál-Farabi atyndaǵy Qazaq ulttyq ýniversitetiniń departament direktory Q. Tastambek Qyzylorda qalanyń turaqty damýyna arnalǵan ǵylymi-innovatsiialyq usynystarymen bólisti. Bul jobalar óńirdiń sý resýrstaryn tiimdi paidalanýǵa jáne uzaq merzimdi turaqty damýyn qamtamasyz etýge yqpal etetin bolady.
Ónerkásip salasyna qatysty «Firma Balaýsa» JShS bas direktory A.Kýznetsov Qazaqstanda jańa tehnologiia boiynsha iri vanadii óndirisin qurý perspektivalaryn tanystyrdy. «PetroQazaqstan Qumkól Resorsiz» AQ menedjeri D. Qasenov ken oryndaryn igerý tiimdiligin arttyrýdyń ǵylymi negizdelgen tásilderine toqtaldy.
Sessiia sońynda qatysýshylar arasynda ashyq pikirtalas ótip, usynylǵan ǵylymi jobalar men bastamalardy óńirde júzege asyrý joldary talqylandy. Ǵalymdar ǵylym men óndiris arasyndaǵy bailanysty nyǵaitý, innovatsiialardy engizý jáne ekologiialyq turaqtylyqty qamtamasyz etý baǵytynda naqty usynystaryn bildirdi.
Ulttyq ǵylym akademiiasy Prezidiýmynyń plenarlyq otyrysy erteń jalǵasyp, óńirdiń ǵylymi-innovatsiialyq áleýetin damytýǵa baǵyttalǵan birqatar mańyzdy máseleler qaralatyn bolady.
