Qazaqstanda ákimshilik jáne qylmystyq amnistiia júrgizý máselesi qarastyrylyp jatyr. Aldyn ala málimet boiynsha, bul shamamen 17 myń adamdy qamtýy múmkin. Qazirgi ýaqytta tiisti zań jobalary ázirlený ústinde, dep habarlaidy Dalanews.kz.
Qazaqparat málimetinshe, Snejanna Imashevanyń aitýynsha, amnistiiaǵa qatysty zań jobalary ázirge talqylanyp jatyr jáne Májilis qaraýynda.
Depýtattyń sózinshe, ákimshilik amnistiia memlekettik organdar salǵan aiyppuldardy keshirýdi kózdeidi. Alaida naqty qandai quqyqbuzýshylyqtar amnistiiaǵa ilinetini ázirge anyqtalmaǵan.
Qazaqstanda 600-den astam aiyppul túri bar. Qazir solardyń qaisysyn amnistiiaǵa qosý múmkindigi qarastyrylyp jatyr. Bul rette ekologiia men sanitarlyq qaýipsizdikke qatysty quqyqbuzýshylyqtar tizimge enbeýi múmkin, óitkeni olar adamdardyń ómiri men densaýlyǵyna qaýip tóndiredi.
Snejanna Imashevanyń aitýynsha, ákimshilik amnistiia birneshe million aiyppuldy qamtýy yqtimal. Bir adamnyń birneshe aiyppuly bolýy múmkin bolǵandyqtan, naqty qansha azamatqa áser etetinin esepteý qiyn.
Buǵan deiin áielder men zeinetkerler sekildi jekelegen sanattarǵa aiyppuldardy tolyq keshirý usynylǵan. Alaida qazir amnistiiany barlyq azamattarǵa birdei qoldaný nusqasy qarastyrylyp jatyr.
Qylmystyq amnistiia bólek qaralyp jatyr. Depýtattyń aitýynsha, ol burynǵy tájiribege uqsas bolady.
Aldyn ala málimet boiynsha, amnistiia aýyr emes jáne ortasha aýyrlyqtaǵy qylmys jasaǵan azamattardy qamtidy. Jalpy sany shamamen 17 myń adam bolýy múmkin.
Snejanna Imasheva ázirlengen zań jobalaryn Parlamentke mamyr aiynyń basynda engizý josparlanyp otyrǵanyn aitty.
