قازاقستاندا اكىمشىلىك جانە قىلمىستىق امنيستيا جۇرگىزۋ ماسەلەسى قاراستىرىلىپ جاتىر. الدىن الا مالىمەت بويىنشا، بۇل شامامەن 17 مىڭ ادامدى قامتۋى مۇمكىن. قازىرگى ۋاقىتتا ءتيىستى زاڭ جوبالارى ازىرلەنۋ ۇستىندە، دەپ حابارلايدى Dalanews.kz.

قازاقپارات مالىمەتىنشە، سنەجاننا يماشيەۆانىڭ ايتۋىنشا، امنيستياعا قاتىستى زاڭ جوبالارى ازىرگە تالقىلانىپ جاتىر جانە ءماجىلىس قاراۋىندا.

دەپۋتاتتىڭ سوزىنشە، اكىمشىلىك امنيستيا مەملەكەتتىك ورگاندار سالعان ايىپپۇلداردى كەشىرۋدى كوزدەيدى. الايدا ناقتى قانداي قۇقىقبۇزۋشىلىقتار امنيستياعا ىلىنەتىنى ازىرگە انىقتالماعان.

قازاقستاندا 600-دەن استام ايىپپۇل ءتۇرى بار. ءقازىر سولاردىڭ قايسىسىن امنيستياعا قوسۋ مۇمكىندىگى قاراستىرىلىپ جاتىر. بۇل رەتتە ەكولوگيا مەن سانيتارلىق قاۋىپسىزدىككە قاتىستى قۇقىقبۇزۋشىلىقتار تىزىمگە ەنبەۋى مۇمكىن، ويتكەنى ولار ادامداردىڭ ءومىرى مەن دەنساۋلىعىنا ءقاۋىپ توندىرەدى.

سنەجاننا يماشيەۆانىڭ ايتۋىنشا، اكىمشىلىك امنيستيا بىرنەشە ميلليون ايىپپۇلدى قامتۋى ىقتيمال. ءبىر ادامنىڭ بىرنەشە ايىپپ ۇلى بولۋى مۇمكىن بولعاندىقتان، ناقتى قانشا ازاماتقا اسەر ەتەتىنىن ەسەپتەۋ قيىن.

بۇعان دەيىن ايەلدەر مەن زەينەتكەرلەر سەكىلدى جەكەلەگەن ساناتتارعا ايىپپۇلداردى تولىق كەشىرۋ ۇسىنىلعان. الايدا ءقازىر امنيستيانى بارلىق ازاماتتارعا بىردەي قولدانۋ نۇسقاسى قاراستىرىلىپ جاتىر.

قىلمىستىق امنيستيا بولەك قارالىپ جاتىر. دەپۋتاتتىڭ ايتۋىنشا، ول بۇرىنعى تاجىريبەگە ۇقساس بولادى.

الدىن الا مالىمەت بويىنشا، امنيستيا اۋىر ەمەس جانە ورتاشا اۋىرلىقتاعى قىلمىس جاساعان ازاماتتاردى قامتيدى. جالپى سانى شامامەن 17 مىڭ ادام بولۋى مۇمكىن.

سنەجاننا يماشيەۆا ازىرلەنگەن زاڭ جوبالارىن پارلامەنتكە مامىر ايىنىڭ باسىندا ەنگىزۋ جوسپارلانىپ وتىرعانىن ايتتى.