Erkin kúres týrnirinde aitýly jetistikke qol jetkizgen jas palýan Dýniia Sibomana álemdik sport qaýymdastyǵy men jankúierlerdiń nazaryn ózine aýdardy, dep habarlaidy dalanews.kz.
6 jasynda Dýniia Sibomana Kongo Demokratiialyq Respýblikasyndaǵy ulttyq saiabaqta ashýly shimpanzeler tobynyń shabýylyna ushyrady. Osy oqiǵadan keiin onyń betiniń jartysy zaqymdanyp, janynda bolǵan aǵasy men nemere aǵasy kóz jumdy.
Sibomana aýyr jaraqat aldy: eki erni, qulaǵynyń bir bóligi, saýsaǵy zaqymdanyp, bulshyqetteri jyrtyldy, betinde iri tyrtyqtar paida boldy. Osy jaǵdaidan keiin oǵan óz aýyldastary músirkei qarai bastady.
8 jasynda Dýniia AQSh-qa qaiyrymdylyq baǵdarlamasy aiasynda jetkizildi. Oǵan onnan astam kúrdeli ota jasalyp, erinderi men bulshyqetteri bileginen alynǵan tinder arqyly qalpyna keltirildi.
Ony asyrap alǵan otbasy jas jetkinshektiń erkin kúrespen ainalysýyna jaǵdai jasady. Dýniia jattyǵýǵa bar kúshin salyp, sporttyq shyńǵa jetýge tyrysty. 13 jasynda jasóspirim kúresten Niý-Iorkte ótken Nassaý okrýginiń chempionatynda top jardy. Sondai-aq talantty sportshy taiaýda Afrika chempionatynda eki altyn medal jeńip aldy: aldymen jastar arasynda, keiin eresekter arasynda qarsylas shaq keltirmedi.
Búginde Dýniia Sibomana 18 jasqa toldy. Qazirgi ýaqytta Sibomana sporttyq mansabyndaǵy keremet kezeńdi basynan ótkerýde. Ol óz jetistikterin sport qaýymdastyǵynyń nazaryn aýdarǵan jeke ómirbaianymen bailanystyra otyryp, ótken shaqtaǵy qily kezeńderin ashyq aita alady. Osylaisha qiyndyqqa moiymai, aǵysqa qarsy júze bilgen qaharman keiipkerimiz kópshilikke qaisarlyq pen tabandylyqtyń úlgisin kórsetip júr.
