ەركٸن كٷرەس تۋرنيرٸندە ايتۋلى جەتٸستٸككە قول جەتكٸزگەن جاس پالۋان دۋنييا سيبومانا ەلەمدٸك سپورت قاۋىمداستىعى مەن جانكٷيەرلەردٸڭ نازارىن ٶزٸنە اۋداردى, دەپ حابارلايدى dalanews.kz.
6 جاسىندا دۋنييا سيبومانا كونگو دەموكراتييالىق رەسپۋبليكاسىنداعى ۇلتتىق ساياباقتا اشۋلى شيمپانزەلەر توبىنىڭ شابۋىلىنا ۇشىرادى. وسى وقيعادان كەيٸن ونىڭ بەتٸنٸڭ جارتىسى زاقىمدانىپ, جانىندا بولعان اعاسى مەن نەمەرە اعاسى كٶز جۇمدى.
سيبومانا اۋىر جاراقات الدى: ەكٸ ەرنٸ, قۇلاعىنىڭ بٸر بٶلٸگٸ, ساۋساعى زاقىمدانىپ, بۇلشىقەتتەرٸ جىرتىلدى, بەتٸندە ٸرٸ تىرتىقتار پايدا بولدى. وسى جاعدايدان كەيٸن وعان ٶز اۋىلداستارى مٷسٸركەي قاراي باستادى.
8 جاسىندا دۋنييا اقش-قا قايىرىمدىلىق باعدارلاماسى اياسىندا جەتكٸزٸلدٸ. وعان وننان استام كٷردەلٸ وتا جاسالىپ, ەرٸندەرٸ مەن بۇلشىقەتتەرٸ بٸلەگٸنەن الىنعان تٸندەر ارقىلى قالپىنا كەلتٸرٸلدٸ.
ونى اسىراپ العان وتباسى جاس جەتكٸنشەكتٸڭ ەركٸن كٷرەسپەن اينالىسۋىنا جاعداي جاسادى. دۋنييا جاتتىعۋعا بار كٷشٸن سالىپ, سپورتتىق شىڭعا جەتۋگە تىرىستى. 13 جاسىندا جاسٶسپٸرٸم كٷرەستەن نيۋ-يوركتە ٶتكەن ناسساۋ وكرۋگٸنٸڭ چەمپيوناتىندا توپ جاردى. سونداي-اق تالانتتى سپورتشى تاياۋدا افريكا چەمپيوناتىندا ەكٸ التىن مەدال جەڭٸپ الدى: الدىمەن جاستار اراسىندا, كەيٸن ەرەسەكتەر اراسىندا قارسىلاس شاق كەلتٸرمەدٸ.
بٷگٸندە دۋنييا سيبومانا 18 جاسقا تولدى. قازٸرگٸ ۋاقىتتا سيبومانا سپورتتىق مانسابىنداعى كەرەمەت كەزەڭدٸ باسىنان ٶتكەرۋدە. ول ٶز جەتٸستٸكتەرٸن سپورت قاۋىمداستىعىنىڭ نازارىن اۋدارعان جەكە ٶمٸربايانىمەن بايلانىستىرا وتىرىپ, ٶتكەن شاقتاعى قيلى كەزەڭدەرٸن اشىق ايتا الادى. وسىلايشا قيىندىققا مويىماي, اعىسقا قارسى جٷزە بٸلگەن قاھارمان كەيٸپكەرٸمٸز كٶپشٸلٸككە قايسارلىق پەن تاباندىلىقتىڭ ٷلگٸسٸن كٶرسەتٸپ جٷر.
