Túrkistan oblysynyń ortalyǵynda “Nashaqorlyqqa jol joq! Biz ómirdi tańdaimyz!” taqyrybynda forým ótti. Is-shara Túrkistan oblysynyń prokýratýrasy men oblystyq politsiia departamentiniń birlesken bastamasymen, oblys ákimdiginiń qoldaýymen uiymdastyryldy, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Aýqymdy sharaǵa QR Ishki ister ministrniń orynbasary Aidar Saitbekov arnaiy qatysty. Sondai-aq, sharaǵa Túrkistan oblysynyń ákimi Darhan Satybaldy, Túrkistan oblysynyń prokýrory Murat Tleýberdiev, politsiia departamentiniń bastyǵy Murat Qabdenov jáne basqa da memlekettik mekemelerdiń basshylary men buryn sotty bolǵan azamattar, turǵyndar, jalpy, myńnan astam adam qatysty.
Jiyn barysynda spiker retinde kelgen elge belgili azamattar óte qajetti maǵlumattar men profilaktikalyq suqbat júrgizip, ómirlik tájiribemen ushtasqan úlgi-ónegelerimen bólisti. Salaýatty ómir saltyn ustanýǵa, jamannan jirenýge shaqyrdy. Qoǵamdaǵy ózekti másele bolyp turǵan esirtkige qatysty qylmystardyń aldyn alý, nashaqorlyqqa tosqaýyl qoiý baǵytynda óz pikirlerin bildirip, kópshilikpen pikir almasty.
Olardyń qatarynda QR IIM esirtki qylmysyna qarsy is-qimyl departamenti bastyǵynyń orynbasary Bahytjan Amirhanov, QR Májilis depýtaty Ardaq Nazarov, QR psihiatr-narkology Nábi Esimov pen qoǵam qairatkeri Orazkúl Asanǵazy, akter Ádil Ahmetov, ánshi Qýandyq Rahym boldy. Forýmnyń shymyldyǵy jastardyń sintetikalyq esirtkini qoldanýy, jalpy onyń kez kelgen adam denesi úshin tigizetin keri áseri, esirtki túrlerin satý, egý, tasymaldaý úshin qylmystyq jaýaptylyq bar ekeni jáne t.b. túrli jaǵdailardy mysal etken teatrlandyrylǵan qoiylymmen túrildi.
Jiyn sońynda “Nashaqorlyqqa jol joq! Biz ómirdi tańdaimyz!” uranymen tiisti qurylymdar aldaǵy ýaqytta birlesip jumys isteýge ýaǵdalasty. Aldyn alý úshin usynystar bildirilip, naqty tapsyrmalar júkteldi.
