Almaty ákimi Darhan Satybaldy zańsyz ornatylǵan statsionarlyq emes saýda nysandaryn retteý jáne qoǵamdyq tamaqtaný oryndary janyndaǵy jazǵy alańdardyń qyzmetin júieleý máseleleri boiynsha arnaiy keńes ótkizdi, dep habarlaidy dalanews.kz.
Qalalyq Kásipkerlik jáne investitsiialar basqarmasynyń basshysy Berikbol Mándibaev júrgizilgen monitoring nátijesinde qala aýmaǵynda 1595 zańsyz statsionarlyq emes saýda nysany anyqtalǵanyn málimdedi. Onyń 509-y memlekettik jer telimderinde ornalassa, 210 nysan jekemenshik aýmaqtarda jerdiń nysanaly maqsatyn buza otyryp qoiylǵan. Sonymen qatar, 876 nysan bekitilgen dizain-kod talaptaryna sáikes kelmeidi. Basqarma basshysynyń aitýynsha, mundai nysandar júrginshiler qozǵalysyna kedergi keltirip, qalanyń sáýlettik kelbetine nuqsan keltirýde ári turǵyndardyń narazylyǵyn týdyryp otyr.
Keńes barysynda qala ákimi zańsyz saýda nysandaryna qatysty baqylaýdy kúsheitip, bul baǵyttaǵy jumystar zań talaptaryna sai, ashyq ári júieli júrgizilýi qajet ekenin atap ótti.
«Bul máselede eń aldymen aýdan ákimderi jaýapty bolýy kerek. Olar kún saiyn aýmaqtardy aralap, zańbuzýshylyqtardy der kezinde anyqtaýǵa mindetti. Jyl basynan beri bar bolǵany 157 nysan súrilgen, bul megapolis úshin óte tómen kórsetkish. Injenerlik jelilerden ajyratý máselesin qarastyryp, politsiiamen birlesip menshik ielerin ákimshilik jaýapkershilikke tartý qajet. Zań bárine birdei bolýy tiis. Bir ai ishinde naqty nátije kútemin», — dedi Darhan Satybaldy.
Qazirgi tańda qalada statsionarlyq emes saýda nysandaryn ornalastyrýǵa arnalǵan 142 arnaiy oryn bekitilgen. Jyl sońyna deiin olardyń sanyn kóbeitý josparlanyp otyr.
Sonymen qatar, keńeste qoǵamdyq tamaqtaný oryndarynyń jazǵy alańdaryn retteý máselesi de talqylandy. Búginde mundai alańdardy qoǵamdyq tamaqtaný oryndarynyń shamamen 30 paiyzy paidalanady. Alaida qazirgi qoldanystaǵy talaptar olardyń ýaqytsha ári jeńil konstrýktsiia ekenin tolyq eskermeidi. Sonyń saldarynan kelisý rásimderi kúrdelenip, ruqsatsyz ornalastyrý jaǵdaiy kóbeigen. Osyǵan bailanysty qalalyq Kásipkerlik jáne investitsiialar basqarmasy kásipkerler úshin rásimderdi jeńildetýge baǵyttalǵan qoldanystaǵy qaǵidalarǵa ózgerister engizýdi usyndy.
