Ózbekstan tarihynda eki dúrkin Olimpiada chempiony atanǵan úsh sportshynyń biri, asa aýyr salmaqtaǵy boksshy Bahadúr Jalolov qazaqstandyq jýrnalist Nurseiit Jylqyshybaiǵa bergen suhbatynda halyq pen kásipkerlerdiń bergen syilyǵynan bas tartqanyn aitqan,- dep habarlaidy Dalanews.kz Qaz365.kz-ke siltep.
«Ózbekstanǵa kelip, Olimpiada oiyndarynyń eki dúrkin chempiony Bahodir Jalolovtan suhbat alý buiyrdy. Suhbat kezinde men odan kásipkerler men halyq qandai syilyq bergenin suradym. Ol «memleketten alǵanym jetedi, qarapaiym halyqtan, kásipkerlerden alyp baiyp ketpeimin, ol syilyqty o dúniege alyp ketpeimin, Olimpiadany eki ret jeńsem elimniń abyroiy úshin jeńdim» dep jaýap berdi.
Al bizdegi jaǵdai she? Anaý páter berdi, mynaý kólik berdi, at mingizdi dep jazyp jatyr. Ainalaiyn altyndarym, sizder el namysyn qorǵaýǵa bardyńyzdar ma, álde dúnie jinaýǵa bardyńyzdar ma?» – deidi jýrnalist Nurseiit Jylqyshybai.
Aita keteiik, Parij Olimpiadasynda baǵy janǵan qazaqstandyq sportshylar elge kelgen soń biraz syi-qurmetke bólendi. Onyń basy júz jylqydan bastalyp, páter men qymbat kóliktermen jalǵasty.
Al ózbekstandyq boksshy Bahodir Jalolov Parijde ótken jazǵy Olimpiada oiyndarynda rekord ornatty. Ol asa aýyr salmaqta eki márte Olimp shyńyn baǵyndyrǵan alǵashqy boksshy atandy.
