Atyraýda qurylysy áli kúnge deıin aıaqsyz qalǵan 25 sport alańynyń búgingi jaǵdaıyna Jańa adamdar alańdaýshylyq bildirip, ákimshilikpen baılanysty. Aqparat kózderine súıensek, bul nysandardyń jalpy qurylysyna 1,2 mıllıard teńge qarjy bólingen. Alaıda 5 jyl boıy qurylysy aıaqtalmaı, sol kúıi tur. 2023 jyldyń kókteminde Jańa Adamdar osy máseleni kótergen tusta Atyraý qalasy ákiminiń orynbasary Nurjan Ermuhanov búkil Qazaqstanǵa kamera aldynda 2023 jyldyń aıaǵy nemese 2024 jyldyń basyna qaraı balalar sport alańdaryn tolyqtaı paıdalana alatynyn aıtyp, ýáde etken edi.
"Halyq qahary" azamattyq naýqanynyń belsendileri osy ýádeniń oryndalǵanyna kóz jetkizý maqsatynda qaıta baqylaý júrgizip, nátıjesinde qurylys “baıaǵy jartas sol jartas” kúıde turǵanyn anyqtady.
Ermuhanovtyń sózinde turmaı, qur ýádemen aldap-arbaǵany, árıne, qynjyltady. “Qulaqqa kespe ilgen” sheneýniktiń sóziniń de, óziniń de qadiri qalmaǵanyna kóz jetti. Jańa Ádiletti Qazaqstanda bılik tarapynan adamdarǵa mundaı qarym-qatynas kórsetýge jol berilmeıdi.
Ashynǵan "Halyq Qahary" azamattyq naýqanynyń belsendileri Nurjan Ermuhanovtyń bos ýádesi men essiz áreketin halyq baǵalaý kerek dep sanaıdy. Sol úshin Atyraý kóshelerine shyǵyp, halyqqa da Úndeý jasady. Atyraýlyqtar da óz oılaryn ashyq bildirýden qymsynǵan joq.
Osylaı Nurjan Ermuhanovqa “aýyrdyń ústimen, jeńildiń astymen” júretin, mindetin durys atqarmaıtyn sheneýnikterge beriletin
“Halyq Qahary” antı-júldesi, LRT tiregi beınesindegi músinshe tabystaldy. Biraq ákim basyn ala qashyp, eshqandaı ýáde bermegenin alǵa tartty. Tipti barlyǵy aıdan anyq kórsetilgen beınejazbany da joqqa shyǵardy. Al “teris marapatty” aıqaı-shýmen belsendiler kabınetke qaldyrdy.
“Men sheneýnikterge, basshylarǵa, dırektorlarǵa, basqarýshylarǵa jáne halyq aldynda jaýapty barlyq adamdarǵa aıtamyn! Qarapaıym bir nárseni este saqtańyzdar. Eger máseleniń sheshilýine uzaq ýaqyt qajet bolsa, adamdar ony umytyp ketedi dep úmittenbeńizder. Kerisinshe, qalalyqtar ádildik ornatyp, ózderin aldap júrgendermen kezdesýdi talap etetin bolady. Bizdiń jobanyń mindeti – osy kezdesýdi uıymdastyrý. Biz muny mindetti túrde oryndaımyz. Bul jaǵymsyz, uıat kezdesýden aýlaq bolýdyń bir ǵana joly bar. Halyq ıgiligi úshin óz jumystaryńyzdy tıimdi jáne adal atqaryńyzdar. Jańa Ádiletti Qazaqstanǵa laıyq áreket etińizder”, — deıdi “Halyq Qahary”azamattyq naýqanynyń kóshbasshysy Alıhan Sarsenov.
