Bishimbaev pen Baijanovtyń isindegi sýdia Aijan Qulbaevany telefon arqyly áldekimder qorqytqan, - dep habarlaidy Dalanews.kz.
Astana qalasynyń Politsiia departamenti sýdia Aijan Qulbaevaǵa qatysty qorqytý deregi boiynsha qylmystyq is qozǵady.
Sýdianyń uialy telefonyna belgisiz nómirden qońyraýlar men qorqytý habarlamalary túsken.
Qylmystyq kodekstiń 407-babynyń 1-bóligi (Sot tóreligin júzege asyrýǵa kedergi jasaý maqsatynda sottyń qyzmetine aralasý) boiynsha sotqa deiingi is júrgizý bastaldy.
Sýdia jeke qaýipsizdik sharalarymen qamtamasyz etilgen.
Sonymen qatar, internette júrgizilgen monitoring barysynda sýdiaǵa qatysty qylmystyq quqyqbuzýshylyq is-áreketteri bar kóptegen jaǵymsyz jariialanym anyqtalypty.
Tekserý is-sharalarynyń nátijeleri boiynsha tergeý organy Qylmystyq kodekstiń 411-babynyń 1-bóligi (Sýdiaǵa jala jabý) boiynsha qylmystyq is qozǵady.
"Zań kez kelgen adamǵa sot tóreligin júzege asyrý protsesine, onyń ishinde sýdianyń atyna jala jabý nemese qorqytý sipatyndaǵy materialdardy jariialaý jolymen, yqpal etýge tyiym salatynyn eskertemiz.
Sot biliginiń bedelin túsiretin áreketterdiń joly kesiledi", - dep eskertti Joǵarǵy sot ókilderi.
Aita keteiik, buǵan deiin sýdia Aijan Qulbaeva aiyptalýshynyń advokaty Erlan Ǵazymjanovqa qatysty sotty qurmettemegeni úshin jeke sot qaýlysyn shyǵarý týraly máseleni talqylaýǵa sot protsesin toqtatty.
"Men Bishimbaevqa suraq qoiyp bitken joqpyn. Sizdiń (sýdianyń) áreketterińizge qarsylyq bildirýge májbúrmyn. Qorǵaýshylardy tyńdamaisyz. Aiyptalýshynyń sóileýine mursha bermeisiz, bizge suraq qoiýǵa múmkindik bermeisiz. Bul birjaqty protsess dep oilaimyz. Bári Bishimbaevqa qarsy", - deidi advokat Erlan Ǵazymjanov.
"Sot qorǵaýshy Ǵazymjanovqa qatysty sot otyrysy barysynda sotty birneshe ret qurmettemegeni úshin jeke qaýly shyǵarý týraly máseleni talqylaý qajet dep sanaidy. Osy sebepti sot keńesý bólmesine shyǵarylady", - dedi sýdia.
