Infokásipker ári bloger Aqbota Ánýarbek úsh jyl buryn bastan ótkergen oqiǵasyn kópshilikpen bólisti. Aitýynsha, ol qazaq qoǵamyna esimi belgili kásipkerden psihologiialyq qysym kórip, 24 mln teńgege aldanǵan, dep habarlaidy Dalanews.kz.
Sońǵy jyldary elimizde infobiznes salasy qarqyndy damyp keledi. Kóptegen kýrstar, marafondar, seminarlar men treningter - osyǵan dálel. Zaman aǵymyna sai, naryqtaǵy jańa mamandyqtyń jiligin shaǵyp, maiyn ishken jandar jetip artylady. Sonymen qatar qainaǵan qazanynyń ortasynda júrip, aýzy kúigen jandar da joq emes. Solardyń biri - qarjy eksperti, bloger Aqbota Ánýarbek.
Jaqynda tiktok jelisinde Ánýarbektiń kóz jasyna erik bergen videosy tarap ketti. Kópshilik ony durys túsinbei, túrli pikir jaza bastady. Munda bloger belgili kásipkerdiń úlken somaǵa qalai aldaǵany týraly aitqan. Bloger kóptiń qyzý talqysyna túsken videoǵa pikir bildirip, instagram jelisinde osy jaittyń tolyq nusqasyn bólisti.
“Aqbota Ánýarbek ne úshin jylady? Bul videony qazaq infobiznesinde kýrs pen mentorlyq alatyn adamdarǵa sabaq bolsyn degen maqsatta aityp otyrmyn.
Men 2021-2022 jyldary bir kisiden sabaq alǵanmyn. Ádette, bilim alý barysynda eki tarap ta qanaǵattanýy kerek. Alaida meniń kýrsqa múldem kóńilim tolmady. Sodan 2022 - 2024 jyldar aralyǵynda depressiiaǵa túsip, ózime degen senim joǵalyp ketti. Sol kúiimdi dál qazir terapiia retinde kóshilikpen bóliskim keldi. Kýrs alatyndar aldymen meniń tájiribeme qulaq assa eken deimin. Kýrs almas buryn mamannyń nátijesi men keistaryna kóz júgirtip, tutynýshylarynyń keri bailanysyna nazar aýdarý qajet. Men bes jyl boiy osy infobiznes salasynda jumys istep kelemin, storis arqyly ónimderimdi satamyn. Ózderińizge málim, sońǵy 3 jylda storiske shyǵa almai kettim.
Sol 2021-2022 jyldary 24 million teńgege sabaq satyp alǵanmyn. Ol sabaqtan psihologiialyq ári emotsionaldy qysym kórgenimdi úsh jyl ótip, jarasy jazylyp, boiaýy sińgennen keiin bólisip otyrmyn. Eshkimniń atyn atap, túsin tústemeimin. Aldyn ala aitqym keledi, búkil eldiń aldynda bireýdi kinálap, iskerlik repýtatsiiasyna nuqsan keltiremin degen niet joq. Men jai ǵana óz oqiǵammen bólisemin. Qalai boldy, bastan aiaq bar shyndyqty aityp beremin. Ony kórgen jáne sózimdi 100 % dáleldep beretin eń jaqyn týystarym men dostarym bar. Sonymen qatar osy oqiǵaǵa kýá bolǵan instagramda ondaǵan myń oqyrmanym bar. Alaida ol kisini qansha surasańyzdar da esimin aitpaimyn. Bul áreketim úshin keshirim suraimyn. Biraq bul mende úsh jyl ótse de jarasy jazylǵanymen, tyrtyǵy qaldy. Men tipti sol kisiniń kýrsyn satýǵa da atsalystym. Eger sol ýaqytta óz tarapymnan qatelik jibergen bolsam, aýditoriiamnan keshirim suraǵym keledi”, - dedi ol.
Onyń sózinshe, ustaz retinde syilasqan janmen tanystyǵy 8 jyl buryn bastaý alǵan. Sol bir jyldary infobiznes salasynda kásipkerdiń aty shyǵyp, qazaq aýditoriiasynda top jaryp turǵan kezi eken.
“Men ony instagram arqyly 2016 jyly tanydym. Inim “bilesiń be, bir qazaq kisi halal tamaq jasaityn biznes ortalyǵyn ashypty, blogerlarmen jarnama jasap jatyr” dep qulaqqaǵys etti. Sóitip men de qyzyǵýshylyq tanytyp, feisbýkten paraqshasyna jazylyp, jazbalaryn oqi bastadym”, - deidi bloger.
Aqbota 2016 jyly Astanada 150 myń teńge jalaqyǵa keńesshi bolyp jumys istegen. Ailyqtan bailyqqa asyqqan jas qyz kóptiń aýzynda júrgen kásipkermen kezdesýdi qalaidy.
“Bir kúni ol kisi Astanada keshki ýaqytta “Plov breik” degen trening ótkizetinin jetkizdi. Baǵasy 12 myń teńge boldy. Men aqshamdy tólep, bardym. Sol kezde marketingke bailanysty qiyn terminder aityldy. Men olardy túsine qoimadym. Sol trening maǵan qatty unady jáne oqýǵa degen qushtarlyǵymdy oiatty. Sóitip 2017 jyly ártúrli jobalar boldy. Meniń qurbym sol kiside oqyǵan bolatyn. Eskertip aitaiyn, kóp adamnyń attaryn atamaimyn. Sóitip ustaz bolǵan kisini kafede kórip qalamyn. Amandasyp, sýretke túsip, kórgenime máz boldym. Qatty úlgi tutatyn edim. Maǵan “kásipker kelbetin” kórsetken adam boldy.
Osylaisha 2018 jyly reseilik kásipkerlerdiń biznes kýrstaryna qatysa bastadym. Al bul kisi qazaqsha júrgizetin. Cóitip 2018 jyldyń sońynda Máskeýge attandym. Aiaz degen kisiniń 6 mln teńge turatyn kýrsyna qatystym. Ol kezde tóleitin aqsham joq, qaryzǵa kirip ketkenmin. 6 mln tóleiin dep turǵan jigitke, “meni de alyp barshy” dep ótinish jasadym. Sóitip Aiazǵa myna jigit aqshasyn tóledi, biraq eger siz shyǵyp ket deseńiz, solai isteimin dedim. Aiaz úndemedi. Sóitip 6 ai boiy hostlda turdym. Bilim alý barysynda instagramdaǵy biznestiń bárin úirenip aldym. Ol kezde jasym 27-de”, - deidi ol.
Osylaisha Ánýarbek 2019 jyly Aiazdan alǵan bilimin sata bastaidy.
“Stýdentterimniń pikirlerin instagram men feisbýkke sala bastadym. Bulardyń barlyǵyn qazaq ustazym da baqylyp otyrdy. Sodan soń maǵan instagramnan jazdy. Osy ýaqytta meniń namysyma tietin áreketter bastaldy. Ne úshin tegin satyp jatqanymdy betime basyp, jeke shekarama óte bastady. Men de ańǵaldyqpen aqtala bastadym”, - deidi ol.
Kásipker tarapynan osyǵan uqsas qysymdar jyldar boiy jalǵasyn tapqan. Tipti ol ózgeniń emes óziniń kýrsyn satyp alýǵa úgittegen kórinedi. Alaida Aqbota bastapqyda oǵan mán bermegen. Nátijesinde, bilim alý maqsatynda 24 mln teńgege aldanyp qalǵan.
“2019 jyly 3 million teńgege alǵashqy kýrsyn satyp aldym. Al 2021 jyly jeke tálimgerliginen óttim. 3 million teńgelik sabaǵynda úsh qana kezdesý boldy. Oǵan múldem kóńilim tolmady. Bir nárse úirendim dep aita almaimyn. Tipti sol kezde aqshamdy keri qaitarýyn surap, talap ete almaǵanmyn. 2020 jyly aqymaqtyǵymmen alǵys aitý maqsatynda oǵan taǵy million teńge aýdardym. Bul shamamen tamyz aiynyń aiaǵy edi. Aqshany bergenim sol, qazan aiynda kúizeliske tústim. Eki ai úiden shyqpadym”, - deidi bloger.
Aqbotanyń bul jazbasy oqyrmandardy oilandyryp qoidy. Tipti kóbi aldaǵan ustazynyń kim ekenine boljam jasap, bir jaqty pikirge kelýde. Sonyń ishinde Qýanysh Shonbaidyń esimi birneshe ret atalǵan.
“Shonbaidyń shańyn qaqtyń ǵoi”, “Shonbai ma bul kisi?”, “Men Aqbotany Shonbai arqyly tanydym”, “Atyn atap aitqanyńyz durys bolatyn edi” degen pikirler jazylǵan.
Tabalap jatqan oqyrmandardyń pikirin naqtylaý úshin Qýanysh Shonbaidyń da paraqshasyna sholý jasap kórdik. Degenmen ol bul jaǵdaiǵa bailanysty eshqandai jazba jariialamaǵan.
