ينفوكاسىپكەر ءارى بلوگەر اقبوتا انۋاربەك ءۇش جىل بۇرىن باستان وتكەرگەن وقيعاسىن كوپشىلىكپەن ءبولىستى. ايتۋىنشا، ول قازاق قوعامىنا ەسىمى بەلگىلى كاسىپكەردەن پسيحولوگيالىق قىسىم كورىپ، 24 ملن تەڭگەگە الدانعان، دەپ حابارلايدى Dalanews.kz.
سوڭعى جىلدارى ەلىمىزدە ينفوبيزنەس سالاسى قارقىندى دامىپ كەلەدى. كوپتەگەن كۋرستار، مارافوندار، سەمينارلار مەن ترەنينگتەر - وسىعان دالەل. زامان اعىمىنا ساي، نارىقتاعى جاڭا ماماندىقتىڭ جىلىگىن شاعىپ، مايىن ىشكەن جاندار جەتىپ ارتىلادى. سونىمەن قاتار قايناعان قازانىنىڭ ورتاسىندا ءجۇرىپ، اۋزى كۇيگەن جاندار دا جوق ەمەس. سولاردىڭ ءبىرى - قارجى ەكسپەرتى، بلوگەر اقبوتا انۋاربەك.
جاقىندا تيكتوك جەلىسىندە انۋاربەكتىڭ كوز جاسىنا ەرىك بەرگەن ۆيدەوسى تاراپ كەتتى. كوپشىلىك ونى دۇرىس تۇسىنبەي، ءتۇرلى پىكىر جازا باستادى. مۇندا بلوگەر بەلگىلى كاسىپكەردىڭ ۇلكەن سوماعا قالاي الداعانى تۋرالى ايتقان. بلوگەر كوپتىڭ قىزۋ تالقىسىنا تۇسكەن ۆيدەوعا پىكىر ءبىلدىرىپ، ينستاگرام جەلىسىندە وسى جايتتىڭ تولىق نۇسقاسىن ءبولىستى.
“اقبوتا انۋاربەك نە ءۇشىن جىلادى؟ بۇل ۆيدەونى قازاق ينفوبيزنەسىندە كۋرس پەن مەنتورلىق الاتىن ادامدارعا ساباق بولسىن دەگەن ماقساتتا ايتىپ وتىرمىن.
مەن 2021-2022 جىلدارى ءبىر كىسىدەن ساباق العانمىن. ادەتتە، ءبىلىم الۋ بارىسىندا ەكى تاراپ تا قاناعاتتانۋى كەرەك. الايدا مەنىڭ كۋرسقا مۇلدەم كوڭىلىم تولمادى. سودان 2022 - 2024 جىلدار ارالىعىندا دەپرەسسياعا ءتۇسىپ، وزىمە دەگەن سەنىم جوعالىپ كەتتى. سول كۇيىمدى ءدال ءقازىر تەراپيا رەتىندە كوشىلىكپەن بولىسكىم كەلدى. كۋرس الاتىندار الدىمەن مەنىڭ تاجىريبەمە قۇلاق اسسا ەكەن دەيمىن. كۋرس الماس بۇرىن ماماننىڭ ناتيجەسى مەن كەيستارىنا كوز جۇگىرتىپ، تۇتىنۋشىلارىنىڭ كەرى بايلانىسىنا نازار اۋدارۋ قاجەت. مەن بەس جىل بويى وسى ينفوبيزنەس سالاسىندا جۇمىس ىستەپ كەلەمىن، ستوريس ارقىلى ونىمدەرىمدى ساتامىن. وزدەرىڭىزگە ءمالىم، سوڭعى 3 جىلدا ستوريسكە شىعا الماي كەتتىم.
سول 2021-2022 جىلدارى 24 ميلليون تەڭگەگە ساباق ساتىپ العانمىن. ول ساباقتان پسيحولوگيالىق ءارى ەموسيونالدى قىسىم كورگەنىمدى ءۇش جىل ءوتىپ، جاراسى جازىلىپ، بوياۋى سىڭگەننەن كەيىن ءبولىسىپ وتىرمىن. ەشكىمنىڭ اتىن اتاپ، ءتۇسىن تۇستەمەيمىن. الدىن الا ايتقىم كەلەدى، بۇكىل ەلدىڭ الدىندا بىرەۋدى كىنالاپ، ىسكەرلىك رەپۋتاسياسىنا نۇقسان كەلتىرەمىن دەگەن نيەت جوق. مەن جاي عانا ءوز وقيعاممەن بولىسەمىن. قالاي بولدى، باستان اياق بار شىندىقتى ايتىپ بەرەمىن. ونى كورگەن جانە ءسوزىمدى 100 % دالەلدەپ بەرەتىن ەڭ جاقىن تۋىستارىم مەن دوستارىم بار. سونىمەن قاتار وسى وقيعاعا كۋا بولعان ينستاگرامدا ونداعان مىڭ وقىرمانىم بار. الايدا ول كىسىنى قانشا سۇراساڭىزدار دا ەسىمىن ايتپايمىن. بۇل ارەكەتىم ءۇشىن كەشىرىم سۇرايمىن. ءبىراق بۇل مەندە ءۇش جىل وتسە دە جاراسى جازىلعانىمەن، تىرتىعى قالدى. مەن ءتىپتى سول كىسىنىڭ كۋرسىن ساتۋعا دا اتسالىستىم. ەگەر سول ۋاقىتتا ءوز تاراپىمنان قاتەلىك جىبەرگەن بولسام، اۋديتوريامنان كەشىرىم سۇراعىم كەلەدى”، - دەدى ول.
ونىڭ سوزىنشە، ۇستاز رەتىندە سىيلاسقان جانمەن تانىستىعى 8 جىل بۇرىن باستاۋ العان. سول ءبىر جىلدارى ينفوبيزنەس سالاسىندا كاسىپكەردىڭ اتى شىعىپ، قازاق اۋديتورياسىندا توپ جارىپ تۇرعان كەزى ەكەن.
“مەن ونى ينستاگرام ارقىلى 2016 جىلى تانىدىم. ءىنىم “بىلەسىڭ بە، ءبىر قازاق كىسى حالال تاماق جاسايتىن بيزنەس ورتالىعىن اشىپتى، بلوگەرلارمەن جارناما جاساپ جاتىر” دەپ قۇلاققاعىس ەتتى. ءسويتىپ مەن دە قىزىعۋشىلىق تانىتىپ، فەيسبۋكتەن پاراقشاسىنا جازىلىپ، جازبالارىن وقي باستادىم”، - دەيدى بلوگەر.
اقبوتا 2016 جىلى استانادا 150 مىڭ تەڭگە جالاقىعا كەڭەسشى بولىپ جۇمىس ىستەگەن. ايلىقتان بايلىققا اسىققان جاس قىز كوپتىڭ اۋزىندا جۇرگەن كاسىپكەرمەن كەزدەسۋدى قالايدى.
“ءبىر كۇنى ول كىسى استانادا كەشكى ۋاقىتتا “پلوۆ برەيك” دەگەن ترەنينگ وتكىزەتىنىن جەتكىزدى. باعاسى 12 مىڭ تەڭگە بولدى. مەن اقشامدى تولەپ، باردىم. سول كەزدە ماركەتينگكە بايلانىستى قيىن تەرميندەر ايتىلدى. مەن ولاردى تۇسىنە قويمادىم. سول ترەنينگ ماعان قاتتى ۇنادى جانە وقۋعا دەگەن قۇشتارلىعىمدى وياتتى. ءسويتىپ 2017 جىلى ءارتۇرلى جوبالار بولدى. مەنىڭ قۇربىم سول كىسىدە وقىعان بولاتىن. ەسكەرتىپ ايتايىن، كوپ ادامنىڭ اتتارىن اتامايمىن. ءسويتىپ ۇستاز بولعان كىسىنى كافەدە كورىپ قالامىن. امانداسىپ، سۋرەتكە ءتۇسىپ، كورگەنىمە ءماز بولدىم. قاتتى ۇلگى تۇتاتىن ەدىم. ماعان “كاسىپكەر كەلبەتىن” كورسەتكەن ادام بولدى.
وسىلايشا 2018 جىلى رەسەيلىك كاسىپكەرلەردىڭ بيزنەس كۋرستارىنا قاتىسا باستادىم. ال بۇل كىسى قازاقشا جۇرگىزەتىن. Cءويتىپ 2018 جىلدىڭ سوڭىندا ماسكەۋگە اتتاندىم. اياز دەگەن كىسىنىڭ 6 ملن تەڭگە تۇراتىن كۋرسىنا قاتىستىم. ول كەزدە تولەيتىن اقشام جوق، قارىزعا كىرىپ كەتكەنمىن. 6 ملن تولەيىن دەپ تۇرعان جىگىتكە، “مەنى دە الىپ بارشى” دەپ ءوتىنىش جاسادىم. ءسويتىپ ايازعا مىنا جىگىت اقشاسىن تولەدى، ءبىراق ەگەر ءسىز شىعىپ كەت دەسەڭىز، سولاي ىستەيمىن دەدىم. اياز ۇندەمەدى. ءسويتىپ 6 اي بويى حوستلدا تۇردىم. ءبىلىم الۋ بارىسىندا ينستاگرامداعى بيزنەستىڭ ءبارىن ۇيرەنىپ الدىم. ول كەزدە جاسىم 27-دە”، - دەيدى ول.
وسىلايشا انۋاربەك 2019 جىلى ايازدان العان ءبىلىمىن ساتا باستايدى.
“ستۋدەنتتەرىمنىڭ پىكىرلەرىن ينستاگرام مەن فەيسبۋككە سالا باستادىم. بۇلاردىڭ بارلىعىن قازاق ۇستازىم دا باقىلىپ وتىردى. سودان سوڭ ماعان ينستاگرامنان جازدى. وسى ۋاقىتتا مەنىڭ نامىسىما تيەتىن ارەكەتتەر باستالدى. نە ءۇشىن تەگىن ساتىپ جاتقانىمدى بەتىمە باسىپ، جەكە شەكاراما وتە باستادى. مەن دە اڭعالدىقپەن اقتالا باستادىم”، - دەيدى ول.
كاسىپكەر تاراپىنان وسىعان ۇقساس قىسىمدار جىلدار بويى جالعاسىن تاپقان. ءتىپتى ول وزگەنىڭ ەمەس ءوزىنىڭ كۋرسىن ساتىپ الۋعا ۇگىتتەگەن كورىنەدى. الايدا اقبوتا باستاپقىدا وعان ءمان بەرمەگەن. ناتيجەسىندە، ءبىلىم الۋ ماقساتىندا 24 ملن تەڭگەگە الدانىپ قالعان.
“2019 جىلى 3 ميلليون تەڭگەگە العاشقى كۋرسىن ساتىپ الدىم. ال 2021 جىلى جەكە تالىمگەرلىگىنەن ءوتتىم. 3 ميلليون تەڭگەلىك ساباعىندا ءۇش قانا كەزدەسۋ بولدى. وعان مۇلدەم كوڭىلىم تولمادى. ءبىر نارسە ۇيرەندىم دەپ ايتا المايمىن. ءتىپتى سول كەزدە اقشامدى كەرى قايتارۋىن سۇراپ، تالاپ ەتە الماعانمىن. 2020 جىلى اقىماقتىعىممەن العىس ايتۋ ماقساتىندا وعان تاعى ميلليون تەڭگە اۋداردىم. بۇل شامامەن تامىز ايىنىڭ اياعى ەدى. اقشانى بەرگەنىم سول، قازان ايىندا كۇيزەلىسكە ءتۇستىم. ەكى اي ۇيدەن شىقپادىم”، - دەيدى بلوگەر.
اقبوتانىڭ بۇل جازباسى وقىرمانداردى ويلاندىرىپ قويدى. ءتىپتى كوبى الداعان ۇستازىنىڭ كىم ەكەنىنە بولجام جاساپ، ءبىر جاقتى پىكىرگە كەلۋدە. سونىڭ ىشىندە قۋانىش شونبايدىڭ ەسىمى بىرنەشە رەت اتالعان.
“شونبايدىڭ شاڭىن قاقتىڭ عوي”، “شونباي ما بۇل كىسى؟”، “مەن اقبوتانى شونباي ارقىلى تانىدىم”، “اتىن اتاپ ايتقانىڭىز دۇرىس بولاتىن ەدى” دەگەن پىكىرلەر جازىلعان.
تابالاپ جاتقان وقىرمانداردىڭ پىكىرىن ناقتىلاۋ ءۇشىن قۋانىش شونبايدىڭ دا پاراقشاسىنا شولۋ جاساپ كوردىك. دەگەنمەن ول بۇل جاعدايعا بايلانىستى ەشقانداي جازبا جاريالاماعان.
