Almatyda burynǵy áıelin aıaýsyz uryp ketken er adam qamaýǵa alyndy, - dep habarlaıdy Dalanews.kz.
BAQ-ta onyń burynǵy polıseı ekeni de aıtylǵan bolatyn. Áıelin uryp-soqqan Aleksandr Kım 25 táýlikke qamaýǵa alynyp, sotqa tartyldy.
"Sot sheshimimen bótenniń múlkin qasaqana búldirip, soqqyǵa jyqqany úshin ol 25 táýlik merzimge ákimshilik qamaýǵa alynyp, aıyppul salyndy", - dedi qalalyq polısıa departamenti ókilderi.
Buǵan deıin áleýmettik jelide er adam áıeldiń telefonyn syndyryp, sodan keıin ony aıaýsyz uryp-soqqany kórinetin vıdeo taraǵan bolatyn.
Jazba avtory jábirlenýshi áıeldiń esimi Saltanat ekenin jazǵan. Áıel 11 jyldyq nekeden keıin ajyrasýǵa sheshim qabyldap, balalaryn alyp, Tarazdan Almatyǵa kóship kelgen. Alaıda avtordyń aıtýynsha, qazir burynǵy kúıeýi kelip, ony ańdyp, májbúrlep qaıtarýǵa tyrysyp jatyr.
Aleksandr Kım esimdi er adam burynǵy áıeli Saltanat pen onyń jaqyndarynan keshirim surady.
"Meniń bul áreketimdi aqtaýǵa bolmaıdy jáne Saltanatqa qol kótermeýim kerek edi. Men aqtalǵym kelip turǵan joq, tek jaǵdaıdy túsindirip ótsem dep edim. Biz 11 jyl birge turdyq. Úlgili otbasy boldyq, bir-birimizdi jaqsy kórdik. Birge saıahattadyq, jas otbasylar qyzyǵatyndaı januıa boldyq. Saltanat ekeýimiz tórt balanyń ata-anasy atandyq. Árıne, ydys-aıaq syldyrlamaı turmaıtyn. Sondaı urystardyń birinde ekige kettik. Biraq sezim qaldy. Kúnderdiń bir kúninde Almatyda kezdesemiz dep kelistik.
Úıge kele jatqan kezde men onyń telefonyn suradym. Onyń, balalarymnyń sýretin kóreıin dedim. Sol kezde Saltanat beıtanys jigitpen turǵanyn kórdim. Ózim ne bolǵanyn túsinbeı qaldym. Qyzǵanyp kettim. Onyń telefonyn alyp, syndyryp jiberdim", - deıdi er adam.
Aleksandr Kım áıeline soqqy qatty tımegenin aıtady.
"Biraq aqtalyp turǵan joqpyn, ony tipti ıterýge quqym joq. Emosıaǵa berilip kettim. Artynsha Taraz qalasyna ketip qaldym", - dedi er adam.
