Biylǵy jyldyń alǵashqy bes aiynda Qazaqstannyń ishki jalpy ónimi 6 paiyzǵa ósip otyr. Qarjy salasynyń mamany Aibar Oljaev 2025 jyldyń baǵytyn aiqyndaý úshin de osy úshinshi toqsandaǵy kartina eń mańyzdy sipatqa ie ekenin aitady, dep habarlaidy Dalanews.kz.
"Biz mamyr aiynyń statistikasyn asyǵa kútken bolatynbyz. Sebebi, maýsymda iskerlik indeks tómendemese, al ol tómendemeitin siiaqty, bizde osy jarty jyldyqty 6 paiyz ósimmen jabýǵa múmkindik bar. Demek, jyldyń baǵytyn aiqyndaý úshin úshinshi toqsandaǵy kartina eń mańyzdy sipatqa ie bolady", dep jazady Aibar Oljaev Facebook-tegi paraqshasynda.
Ol ekonomika ósimindegi negizgi impýlsti kólik pen logistika, qurylys, ónerkásip pen óndiris bergenin naqtylaidy.
"Biyldan bastap eń qatty óskeni - kólik tasymaly salasy. Temirjolmen júkti tasymaldaý 17 paiyzǵa, qubyr arqyly shikizat tasymaldaý 13,8 paiyzǵa artqan. Demek Qazaqstan ekonomikasynda logistika baǵyty kún sanap mańyzdy sektorǵa ainalyp keledi. Biz, áý basta, negizgi úmitti osy logistikaǵa artqan bolatynbyz. Qazaqstannyń Orta dálizdegi negizgi memleket retinde tanylýyn osy sandardan kórýge bolady", - deidi ol.
Onyń aitýynsha, taǵy bir lokomotivtiń biri - qurylys salasy.
"Qurylys osy bes aida 15,4%-ǵa artqan. Eldegi barlyq óńirlerde qarqyndy qurylys júrgizilip keledi. Ǵimarattar, joldar, kópirler, zaýyttar men fabrikalar salynýda. Sonymen birge ónerkásiptiń ósýi qýantady, Qazaqstan molynan tyńaitqyshtar, himiia, tsement, qus etin ázirleýdiń arqasynda ónerkásipte 6,4% ósim bar", - deidi Oljaev.
Maman óndiris sektorynda biz 30 jyl boiy kútip júrgen bir trend oryn alǵanyn basa atap kórsetedi.
"Buryn bul sektordyń damýyn shiki munai men metal óndirý, iaǵni shikizattyq sektor qamtamasyz etetin. Biyl sektordaǵy basym úleske óńdeý baǵyty ie bolyp otyr. Iaǵni, negizgi ósimdi shikizatty qazyp alyp satý emes, ony óńdep, daiyn taýarǵa ainaldyrý isi berip otyr. Munaiǵa degen táýeldilikti jylyna 1-2 paiyz bolsa da qysqarta berýge bet alǵan siiaqtymyz. Ony biyldyń jyldyń jalpy qorytyndysy shyqqanda, ótken jylmen salystyryp tolyq aita alamyn", - deidi ol.
"Jalpy alǵanda jaǵymdy tendentsiianyń iisi seziledi", degen maman 17 megajoba týraly áńgimeni jalǵastyrady.
"Osy tizimdegi eki megajobanyń avtokólik qurylysyna qatysy bar. Biyl Qostanai oblysynda KIA zaýyty iske qosylady. Oǵan 131 milliard teńge investitsiia quiyldy. Jylyna 70 myń KIA avtokóligi qurastyrylyp, ony jaqyn, alys shetelderge eksporttai bastaimyz. Taǵy bir paidasy, onda bir jarym myń adam jumys isteitin bolady. Biyl Almatyda Chery, Haval jáne Changan avtokólikterin shyǵaratyn kópbrendti zaýyt jumysyn bastaidy. Onda qurastyrylǵan Qytai kólikteri Eýraziialyq ekonomikalyq odaq naryǵyn jaýlamaq. Sebebi, Qazaqstanda jasalǵandyqtan poshlina tólenbeidi. Sondyqtan Qazaqstannan alý tiimdi bolmaq. Ekonomikanyń ósýi, fiskaldy stimýldar arqyly (memlekettiń ekonomikaǵa arzan kreditter arqyly aqsha quiýy) ishki tutynýdyń artýy jaǵdaiynda ósim men infliatsiia arasyndaǵy idealdy balansty tabý qatty mańyzdy bolyp otyr. Ekonomika ósip, aqsha kóbeiip, biraq artynan qymbatshylyq ursa, bul bizdiń tabysymyz ben jetistigimizdi joqqa shyǵaryp jiberedi. Halyq bir qadam alǵa júrip, artynan eki qadam artqa sheginbek. Osy suraqty qaperde ustap otyrý qajet", dep sózin qorytyndylaidy Aibar Oljaev.
Buǵan deiin 2025 jyldyń qańtar-mamyr aralyǵynda Qazaqstannyń JIÓ 6%-ǵa óskenin habarlaǵanbyz.
