Kásipkerlikti qoldaý, negizgi ulttyq jáne investitsiialyq jobalardy iske asyrý úshin «Báiterek» holdingi 8 trln teńge bóledi. Ol biyl elimizde JIÓ-niń naqty ósimine qosymsha 1,3% úles qosady dep kútiledi, dep habarlaidy Dalanews.kz.
Úkimette Premer-ministrdiń orynbasary – ulttyq ekonomika ministri Serik Jumanǵarinniń tóraǵalyǵymen ótken Qazaqstan ekonomikasynyń ósýin qamtamasyz etý jónindegi shtab otyrysynda «Báiterek» holdinginiń negizgi ekonomikalyq kórsetkishteri men investitsiialyq jobalary qaraldy.
Úkimet ekonomikanyń naqty sektoryn qarqyndy damytý maqsatynda «Báiterek» holdingin kapitaldandyrýdy 1 trln teńgege ulǵaityp otyr. Bul holdingke kásipkerlikti qoldaýǵa, turǵyn úi qurylysyn damytýǵa jáne negizgi ulttyq jáne investitsiialyq jobalardy iske asyrýǵa shamamen 8 trln teńge bólýge múmkindik beredi. Shtab otyrysynda holding tóraǵasynyń orynbasary Jandos Shaihy birinshi toqsanda 1,2 trln teńge igerilgenin aitty. Al jospar boiynsha 1 trln teńge bolatyn. Budan basqa, biyl «Báiterek» arqyly iske qosylatyn jobalardyń jalpy qosylǵan qunynyń kólemi 521,5 mlrd teńge.
Jobalardyń eń úlken investitsiialyq pýly Qazaqstannyń damý bankinde shoǵyrlanǵan. Biyl 2,2 trln teńgege 66 joba júzege asyrylady. Investitsiia salynǵan negizgi salalar – kólik, logistika jáne bailanys (34%), metallýrgiia (19%), himiia ónerkásibi (12%). Jobalardyń barlyǵyna qarjy bólingen soń, el ekonomikasyna jańa óndiris, taýar men qyzmet túrinde 37,8 trln teńge mólsherinde salym túsiriledi. Negizgi kapitalǵa salynǵan investitsiia biyl 1,6 trln teńge. 2025 jyly qarjy bólý josparlanǵan QDB-nyń basty investitsiialyq jobalarynyń qatarynda Jambyl oblysyndaǵy natrii tsianidin óndirý zaýyty, Túrkistan oblysyndaǵy kúkirt qyshqyly zaýyty, Qostanai oblysyndaǵy ystyq brikettelgen temir óndirý jónindegi iri qazaqstandyq kásiporyn jáne basqalar bar.
Osy jyly 1,5 trln teńgeniń 181 investitsiialyq jobasy ónerkásipti damytý qorynda (ÓDQ) qalyptastyryldy. Negizgi salalar – infraqurylymdy damytý (27%), metallýrgiia (21%) jáne himiia ónerkásibi (13%). ÓDQ-nyń barlyq jobalaryn qarjylandyrýdyń qorytyndysynda jalpy qosylǵan qun kólemi – 19,4 trln teńge. Negizgi kapitalǵa salynǵan investitsiia biyl 1,44 trln teńge boldy. 2025 jyly qarjylandyrý josparlanǵan ÓDQ basty investitsiialyq jobalarynyń qataryna «Global Trans kompaniia» JShS shekaralyq temir jol ótkelin salý, «EEK» AQ energoblogyn qaita jańartý, «Qarmet» AQ óndirisin jańǵyrtý, «Rail Way Steel» JShS elektrometallýrgiialyq zaýytyn salý kiredi.
Qazaqstan Investment Corporation 2025 jyly qarjylandyrýy 2,8 trln teńge deńgeiinde bolýy tiis JQQ-men 10 investitsiialyq jobaǵa shamamen 500 mlrd teńge salýdy josparlap otyr. Biyl negizgi kapitalǵa salynǵan investitsiia – 200 mlrd teńge. Osy jylǵa arnalǵan QIC negizgi 5 investitsiialyq jobasy – Qaraǵandy oblysynda metallýrgiialyq klasterdi damytý, «AralSoda» JShS-niń kaltsilengen sodasyn jáne «Batys Bitum» JShS-niń bitýmyn, «Aqtaý energetikalyq kompaniiasy» JShS-niń bý-gaz elektr stansasyn óndirý zaýytyn salý.
«Damý» qory 2025 jyly shaǵyn jáne orta bizneske jeńildikpen nesie berý kólemin 750 mlrd teńgege deiin ulǵaitýdy josparlady. Bul 2024 jylmen salystyrǵanda 3 esedei artyq. 2025 jylǵy 1 toqsanda 755 kásipkerge 53 mlrd teńge berildi. Qaryzdarǵa kepildik berý kólemi 1400 mlrd teńgege deiin artty. I toqsanda 160 mlrd teńge somasyna kepildikter berildi.
Agroónerkásiptik keshendi qoldaýda 2025 jylǵy 6 mamyrdaǵy jaǵdai boiynsha Agrarlyq nesie korporatsiiasy 5,8 mln gektar egis alqabyn qamti otyryp, kóktemgi egis jumysyna qarjy berýdiń jeńildetilgen baǵdarlamasy boiynsha 363 mlrd teńgege 6 myńǵa jýyq fermerdiń ótinimin qanaǵattandyrdy.
Shtab otyrysynyń qorytyndysynda vitse-premer qarapaiym zattar ekonomikasy baǵdarlamasy boiynsha investitsiialyq jobalardyń qymbat importty almastyrýǵa jáne sol arqyly infliatsiiany tejeýge múmkindik beretin ishki naryqta suranysqa ie taýarlar óndirisiniń jetkiliksiz usynylǵanyn atap ótti.
«Biz ekonomikanyń naqty sektoryn qoldaý baǵdarlamasyna bastamashylyq jasaǵan kezde, iri jobalarmen qatar Ulttyq ekonomika ministrliginen turmystyq himiia, gigiena, irimshikter, konserviler, shujyqtar jáne turǵyndarymyz arasynda suranysqa ie basqa da ónimder óndirisin jolǵa qoiý jobalary boiynsha investitsiialarǵa tapsyrys jariialadyq. Qus óndirý boiynsha jaqsy ilgerileý bar ekenin kórip otyrmyz. Jyl sońyna deiin tutyný deńgeii tolyq qamtamasyz etilýi tiis. Biraq import kóbirek saqtalyp otyrǵan basqa salalarda da óndirýshilerdi izdep, osy jobalarǵa kómek kórsetý qajet», — dep atap ótti Serik Jumanǵarin.
Aita ketsek, keibir sarapshylar biýdjet tapshylyǵy kezeńinde «Báiterek» holdingige qomaqty somanyń bólinýin aqylǵa qonymsyz dep aitqan edi. Úkimetke ekonomikany jáne keibir basym salalardy memlekettiń aqshasymen "azyqtandyrý" ádetin qoiý kerektigi týraly usynys ta jasalǵan.
