Eks-sýdia Svetlana Jolmanova tergeý izoliatorynda otyrǵanyna qaramastan, is boiynsha ekinshi aiyptalýshy – Daniiar Qushalievke qoqan-loqy jasap, onyń balalaryna aqsha aýdarýdy talap etip otyr, dep habarlaidy Dalanews.kz Bes.media-ǵa siltep.
Bul týraly sotta Qushalievtiń qorǵaýshysy Kamila Tóken málimdedi. Onyń aitýynsha, Jolmanova eger aqsha aýdarylmasa, Qushalievti qaita qamaýǵa aldyramyn dep qorqytyp, psihologiialyq qysym kórsetken.
Sot otyrysynda Jolmanovanyń jazǵan úsh habarlamasy oqyldy. Olar messendjer arqyly qolmen jazylǵan jazbalardyń sýreti retinde joldanǵan. Onda belgili bir soma men aqsha aýdarýǵa arnalǵan telefon nómirleri kórsetilgen. Advokat bul materialdardy iske tirkeýdi jáne tiisti shara qoldanýdy surady.
Sotta habarlamalardyń túpnusqasy kórsetildi. Sýdia Qanat Arynov jazbalardyń kóshirmesin iske tirkeýge kelisti, biraq Jolmanovaǵa qatysty eshqandai shara qoldanbady. Ol «sot – qylmystyq qýdalaý organy emes» ekenin aityp, quqyq qorǵaý organdaryna júginýge keńes berdi.
5 mamyrdaǵy otyrysqa Jolmanova taǵy da kelmedi. Bul joly densaýlyǵyna silteme jasaǵan. Alaida dárigerler onyń sotqa qatysýyna esh kedergi joq degen qorytyndy shyǵarǵan. Protsess bastalǵaly ol tek 15 sáýirdegi aldyn ala tyńdaýǵa kelgen. Qalǵan bes otyrys keiinge shegerilgen, al altynshysy onyń qatysýynsyz ótti.
Is týraly ne belgili?
Svetlana Jolmanovaǵa qatysty is Almatydaǵy Medeý aýdandyq №2 sotynda qaralyp jatyr. Oǵan 1 mlrd teńgeni alaiaqtyq jolmen iemdendi degen aiyp taǵylǵan. Tergeý nusqasyna sai, ol túrli tenderler men jyljymaityn múlik mámilelerine kómektesemin dep, eks-ákimniń áielimen aralasamyn degen syltaýmen adamdardy aldaǵan. Jumystan ketken soń da ózin sýdia retinde tanystyryp, aqsha bopsalaýdy jalǵastyrǵan. Qazirgi tańda 48 epizod tirkelgen, jábirlenýshiler arasynda sýdialar da bar.
Ekinshi aiyptalýshy — burynǵy politsei Daniiar Qushaliev. BAQ málimetinshe, ol buǵan deiin para alý faktisi boiynsha ustalǵan.
