ەكس-سۋديا سۆەتلانا جولمانوۆا تەرگەۋ يزولياتورىندا وتىرعانىنا قاراماستان، ءىس بويىنشا ەكىنشى ايىپتالۋشى – دانيار قۇشالييەۆكە قوقان-لوقى جاساپ، ونىڭ بالالارىنا اقشا اۋدارۋدى تالاپ ەتىپ وتىر، دەپ حابارلايدى Dalanews.kz Bes.media-عا سىلتەپ. 

بۇل تۋرالى سوتتا قۇشالييەۆتىڭ قورعاۋشىسى كاميلا توكەن مالىمدەدى. ونىڭ ايتۋىنشا، جولمانوۆا ەگەر اقشا اۋدارىلماسا، قۇشالييەۆتى قايتا قاماۋعا الدىرامىن دەپ قورقىتىپ، پسيحولوگيالىق قىسىم كورسەتكەن.

سوت وتىرىسىندا جولمانوۆانىڭ جازعان ءۇش حابارلاماسى وقىلدى. ولار مەسسەندجەر ارقىلى قولمەن جازىلعان جازبالاردىڭ سۋرەتى رەتىندە جولدانعان. وندا بەلگىلى ءبىر سوما مەن اقشا اۋدارۋعا ارنالعان تەلەفون نومىرلەرى كورسەتىلگەن. ادۆوكات بۇل ماتەريالداردى ىسكە تىركەۋدى جانە ءتيىستى شارا قولدانۋدى سۇرادى.

سوتتا حابارلامالاردىڭ ءتۇپنۇسقاسى كورسەتىلدى. سۋديا قانات ارىنوۆ جازبالاردىڭ كوشىرمەسىن ىسكە تىركەۋگە كەلىستى، ءبىراق جولمانوۆاعا قاتىستى ەشقانداي شارا قولدانبادى. ول «سوت – قىلمىستىق قۋدالاۋ ورگانى ەمەس» ەكەنىن ايتىپ، قۇقىق قورعاۋ ورگاندارىنا جۇگىنۋگە كەڭەس بەردى.

5 مامىرداعى وتىرىسقا جولمانوۆا تاعى دا كەلمەدى. بۇل جولى دەنساۋلىعىنا سىلتەمە جاساعان. الايدا دارىگەرلەر ونىڭ سوتقا قاتىسۋىنا ەش كەدەرگى جوق دەگەن قورىتىندى شىعارعان. پروسەسس باستالعالى ول تەك 15 ساۋىردەگى الدىن الا تىڭداۋعا كەلگەن. قالعان بەس وتىرىس كەيىنگە شەگەرىلگەن، ال التىنشىسى ونىڭ قاتىسۋىنسىز ءوتتى.

ءىس تۋرالى نە بەلگىلى؟

سۆەتلانا جولمانوۆاعا قاتىستى ءىس الماتىداعى مەدەۋ اۋداندىق №2 سوتىندا قارالىپ جاتىر. وعان 1 ملرد تەڭگەنى الاياقتىق جولمەن يەمدەندى دەگەن ايىپ تاعىلعان. تەرگەۋ نۇسقاسىنا ساي، ول ءتۇرلى تەندەرلەر مەن جىلجىمايتىن مۇلىك مامىلەلەرىنە كومەكتەسەمىن دەپ، ەكس-اكىمنىڭ ايەلىمەن ارالاسامىن دەگەن سىلتاۋمەن ادامداردى الداعان. جۇمىستان كەتكەن سوڭ دا ءوزىن سۋديا رەتىندە تانىستىرىپ، اقشا بوپسالاۋدى جالعاستىرعان. قازىرگى تاڭدا 48 ەپيزود تىركەلگەن، جابىرلەنۋشىلەر اراسىندا سۋديالار دا بار.

ەكىنشى ايىپتالۋشى — بۇرىنعى پوليسەي دانيار قۇشالييەۆ. ب ا ق مالىمەتىنشە، ول بۇعان دەيىن پارا الۋ فاكتىسى بويىنشا ۇستالعان.