Shymkentte jumys isteıtin jastarǵa arnalǵan turǵyn úı baǵdarlamasy aıasynda júzdegen páter zańsyz bólingeni belgili boldy. Tekserý nátıjesinde shamamen 500 páterdiń zańsyz jolmen berilgeni anyqtaldy, dep habarlaıdy Dalanews.kz "Jetinshi arnaǵa" silteme jasap.

2019 jyly bul páterler 5 jyl merzimge, satyp alý quqyǵynsyz jalǵa berilgen edi. Alaıda tekserý barysynda keıbir jalǵa alýshylardyń atyna basqa turǵyn úı tirkelgeni, al keıbiri memleket bergen páterlerdi basqa adamdarǵa jalǵa berip, paıda tapqany belgili boldy.

Qala ákimdigi zań buzylǵan barlyq páterdiń komýnaldyq menshikke qaıtarylatynyn málimdedi. Al turǵyndar páterlerdi óz erkimen bosatpasa, sot arqyly májbúrli túrde shyǵarylady.

"Turǵyn úı saıasaty basqarmasyna tıisti eskertý jasaldy. Másele qatań baqylaýǵa alyndy. Qazir mamandar buzýshylyqtardy joıý baǵytynda belsendi jumys istep jatyr. Sot organdaryna 439 turǵyndy shyǵarý týraly talap-aryz joldandy. Búginge deıin eki is boıynsha sheshim ákimdik paıdasyna shyqty", – dedi qala ákiminiń orynbasary Sársen Quranbek.

Bılik ókilderi mundaı sharalar ádildikti qalpyna keltirip, turǵyn úıge shyn muqtaj jastarǵa múmkindik berýge baǵyttalǵanyn aıtty.