شىمكەنتتە جۇمىس ىستەيتىن جاستارعا ارنالعان تۇرعىن ءۇي باعدارلاماسى اياسىندا جۇزدەگەن پاتەر زاڭسىز بولىنگەنى بەلگىلى بولدى. تەكسەرۋ ناتيجەسىندە شامامەن 500 پاتەردىڭ زاڭسىز جولمەن بەرىلگەنى انىقتالدى، دەپ حابارلايدى Dalanews.kz "جەتىنشى ارناعا" سىلتەمە جاساپ.

2019 جىلى بۇل پاتەرلەر 5 جىل مەرزىمگە، ساتىپ الۋ قۇقىعىنسىز جالعا بەرىلگەن ەدى. الايدا تەكسەرۋ بارىسىندا كەيبىر جالعا الۋشىلاردىڭ اتىنا باسقا تۇرعىن ءۇي تىركەلگەنى، ال كەيبىرى مەملەكەت بەرگەن پاتەرلەردى باسقا ادامدارعا جالعا بەرىپ، پايدا تاپقانى بەلگىلى بولدى.

قالا اكىمدىگى زاڭ بۇزىلعان بارلىق پاتەردىڭ كوممۋنالدىق مەنشىككە قايتارىلاتىنىن مالىمدەدى. ال تۇرعىندار پاتەرلەردى ءوز ەركىمەن بوساتپاسا، سوت ارقىلى ءماجبۇرلى تۇردە شىعارىلادى.

"تۇرعىن ءۇي ساياساتى باسقارماسىنا ءتيىستى ەسكەرتۋ جاسالدى. ماسەلە قاتاڭ باقىلاۋعا الىندى. ءقازىر ماماندار بۇزۋشىلىقتاردى جويۋ باعىتىندا بەلسەندى جۇمىس ىستەپ جاتىر. سوت ورگاندارىنا 439 تۇرعىندى شىعارۋ تۋرالى تالاپ-ارىز جولداندى. بۇگىنگە دەيىن ەكى ءىس بويىنشا شەشىم اكىمدىك پايداسىنا شىقتى"، – دەدى قالا اكىمىنىڭ ورىنباسارى سارسەن قۇرانبەك.

بيلىك وكىلدەرى مۇنداي شارالار ادىلدىكتى قالپىنا كەلتىرىپ، تۇرعىن ۇيگە شىن مۇقتاج جاستارعا مۇمكىندىك بەرۋگە باعىتتالعانىن ايتتى.