Atap aıtqanda, prezıdent AQSH-ty klımat jónindegi Parıj kelisimine qaıta qosyp, AQSH-tyń Dúnıejúzilik densaýlyq saqtaý uıymyna músheligin qalpyna keltirdi.
«Biz buryn-sońdy bolmaǵan dárejede klımattyń ózgerýmen kúresemiz» dedi Baıden.
«Amerıka daýysy» saıtynyń jazýynsha, Baıden sonymen birge musylmandar kóp shoǵyrlanǵan keıbir el turǵyndarynyń AQSH-qa kirýine qoıylǵan shekteýdi joıatyn buıryqqa qol qoıǵan. Kapıtolııdegi saltanatty shara aıaqtala salysymen onyń kómekshileri Baıdenniń AQSH pen Meksıka arasyndaǵy dýal qurylysyn toqtatatynyn da habarlaǵan.
Donald Tramp 2017 jyly Parıj kelisimin «AQSH ekonomıkasy úshin qolaısyz kelisim boldy» dep atap, óz elin bul kelisimnen shyǵaratynyn málimdegen. AQSH resmı túrde bul kelisimnen 2020 jyly qarasha aıynda shyqty. Onyń qaıta qosylýy úshin bir aı ýaqyt kerek bolady.
Senator-respýblıkashyl Ted Krýz Baıdenniń Parıj kelisimine oralý bastamasyn synap, «bul sheshim Amerıkany álemde kóshbasshy etpeıdi, klımat máselesin de sheshpeıdi, sonyń saldarynan myńdaǵan amerıkalyq jumysynan aıyrylady» dep málimdedi.
Al senator-respýblıkashyl Kevın Kramer Baıden sheshimin «aqylǵa qonymdy qadam» dep atap, tek jańa ákimshilik Amerıkanyń ulttyq múddesin umytpaı, amerıkalyq salyq tóleýshilerdiń aqshasynyń ysyrap bolýyna jol bermeýi tıis dedi.
