Jáńgir han atyndaǵy Batys Qazaqstan agrarlyq-tehnikalyq ýniversitetiniń jas ǵalymdary kiik etinen shujyq jasaýdy qolǵa aldy, - dep habarlaidy Dalanews.kz
Joba jetekshisi, «Taǵam qaýipsizdigi» ǵylymi-zertteý zerthanasynyń meńgerýshisi, tehnika ǵylymdarynyń kandidaty, dotsent mindetin atqarýshy Aian Orazovtyń málim etkenindei, kiik etinen daiyndalatyn shujyq 30 paiyz qus etimen (úirek pen qaz) aralastyrylady.
Aian Jarylqasynulynyń sózine qaraǵanda, eń basty maqsat — ónimniń tutynýshylyq qasietin anyqtap alý.
— Aldymen biz kiik etiniń sapalyq kórsetkishterin zerttep, sodan keiin qaýipsizdik kórsetkishterin, iaǵni mikrobiologiialyq qaýipsizdigin, quramynda qaýipti ishek taiaqshasy, patogendi jáne shartty patogendi bakteriialarynyń bolmaýyn qatań túrde baqyladyq. Etti taǵamdyq maqsatta qoldanýǵa jaramdylyǵy anyqtalǵannan keiin shujyqqa paidalanylatyn etti túrli retseptýralarmen daiyndap kórdik. Solardyń ishinen qajettisin tańdap aldyq, — deidi Aian Orazov.
Búginde jas ǵalymdar kiik etinen shujyq daiyndaý tehnologiiasyn jetildirip, daiyn ónimdi tekseriske jiberip, sapalyq kórsetkishin anyqtaý úshin jumys istep jatyr. Terminaldyq óńdeýdiń durystyǵyn qadaǵalap, daiyn ónimniń adam densaýlyǵyna keri áseri bolmaýy — basty nazarda.
Ýniversitet oqytýshysy, magistr Aidana Bekbosynova shujyqtyń retseptýrasyn qurastyrý barysynda qaisysy yńǵaily, qaisysy utymdy ekeni tolyq zerdelengenin jetkizdi.
— Tartylǵan etke tuz, burysh, sarymsaq sekildi dámdeýishter qosylady. Zertteý barysynda kiik etiniń sóli kóp bolatyny baiqaldy. Daiyn ónim tońazytqyshta eki aptaǵa deiin saqtalady, — deidi jas ǵalym.
Ǵylymi jumys jańadan bastalyp jatqandyqtan, ǵalymdar daiyn ónimniń saqtalý sharttaryn áli de zerttep kóredi.
Shujyqqa qoldanylatyn shikizattyń barlyǵy da — tabiǵi ónimder. Zerthanaǵa kiik ushasy Jáńgir han ýniversitetine qarasty «Aqbóken» tálimbaǵynan ákelinedi. Bir kiikten 13-15 keli kóleminde et alynady. Úirek pen qaz bilim ordasynyń oqý-ǵylymi-óndiristik ortalyǵynda ósiriledi. Al olardy zertteý jumystary ýniversitettiń synaý ortalyǵyndaǵy zerthanalarda júrgiziledi.
Jas ǵalymdardyń bul bastamasyna ýniversitet basshylyǵy qoldaý bildirip otyr. Qazirgi ýaqytta ónimniń artyqshylyǵy, jańashyldyǵy týraly sheteldik basylymdarǵa ǵylymi maqala jariialap, otandyq ǵylymdy tanytýǵa den qoiylyp otyr.
Jas ǵalymdar barlyq suranys qanaǵattandyrylsa, ónimge ónertabys patentin alyp, naryqqa shyǵýdy kózdep otyr.
