Azamattyq qorǵaý júiesinde kezdeisoq adamdar bolmaidy — munda adam ómirin qutqarý men qaýipsizdikti qamtamasyz etýdi abyroily is dep biletin jandar qyzmet etedi. Sonyń jarqyn mysaly — Mańǵystaý oblysy Tótenshe jaǵdailar departamentiniń qyzmetkerleri, aǵaiyndy egizder Eldos pen Eljas Halelovtar. Bul mamandyqty olar birlese tańdap, júrek qalaýymen kelgen.
1998 jylǵy 26 sáýirde Beineý aýdanynda dúniege kelgen Eldos pen Eljas 2020 jyly Azamattyq qorǵaý akademiiasyn «Órt qaýipsizdigi» mamandyǵy boiynsha támamdady. Sol kezden bastap ekeýi de tótenshe jaǵdailar júiesinde ártúrli baǵyttarda qyzmet etýde.
Eldos Halelov — Aqtaý qalasy Tótenshe jaǵdailar basqarmasynyń bas mamany. Onyń kúndelikti jumysy — tótenshe jaǵdailardyń aldyn alý jáne olardy joiý sharalaryn úilestirý, oqý-jattyǵýlarǵa qatysý jáne halyqtyń qaýipsizdigin baqylaý. Ol eń kúrdeli sátterde júieniń birqalypty jumys isteýine jaýap beredi.
Al Eljas Halelov tsifrlandyrý, aqparattandyrý jáne bailanys bóliminde eńbek etedi. Ol — aqparattyq júieler, bailanys quraldary men tsifrlyq platformalardyń úzdiksiz jumysyn qamtamasyz etetin maman. Onyń qyzmetinsiz shuǵyl áreket etý de, naqty taldaý jasaý da múmkin emes, al bul tótenshe jaǵdailarda sheshim qabyldaýdyń negizi.
Mindetteri ártúrli bolǵanymen, olardyń jumysy — birtutas júieniń qos qanaty ispettes. Biri alǵy shepte áreket etse, ekinshisi senimdi tylmen qamtamasyz etedi. Bul — dástúrli qyzmet pen zamanaýi tehnologiianyń tiimdi úilesim tabýynyń kórinisi.
«Meniń jumysym turaqty bailanys pen naqty aqparatqa negizdeledi. Tehnikalyq jaǵynan baýyrymnyń qoldaýy árdaiym seziledi», — deidi Eldos.
«Eldosta — órt bolsa, mende — júiede «ot» tutanady», — dep Eljas baýyrynyń sózin jalǵasady.
Halelovtar baýyrlardyń oqiǵasy — jas mamandar úshin shabyt kózi. Bul tek mamandyq jaily emes, adaldyq, komandalyq jumys pen otbasylyq qoldaýdyń arqasynda TJ qyzmetiniń qanshalyqty senimdi bola alatynyn dáleldeitin shynaiy oqiǵa.
