"Maǵan kýpe, 19 oryn dep edi". "Platskarttaǵy tórt adamdyq oryndy kýpe" dep te aitady" dedim. Ol kóńili jailanyp zattaryn jaiǵastyra bastady.
"Tym jassyz. Turmysta ekensiz ǵoi" dedim. "Turmysta bolǵam. Astanada erteń sot bolady, sotpen ajyrasyp jatyrmyz" dedi ol. Əli shai ishken joqpyz. Jaqyn tanysyp ta úlgermedik. Minezi ashyq. Bəlkim, jastyqqa tən albyrttyq. "Qyzymdy əke-shesheme qaldyryp edim. Saǵynyp otyrmyn" dedi.
Sampyldap sóilep jatty.
"Astanada enem bizben turdy. Jumys istemeidi. Əli zeinet jasyna jetken joq. Bir kúni eden jýýshynyń jumysyn taýyp keldi. Eki saǵat qana eden jýasyz, jalaqy otyz myń teńge. Ózi eki kún jýdy da, jumysty maǵan berdi. Tańerteń altyda turyp, eden jýyp, toǵyzda basqa jumysyma baryp júrdim. Erteli-kesh kassada turdym. Bir kúni aiaǵym aýyr kezde myń teńgege tamaq iship edim, "Adam myń teńgege tamaq ishe me?" dep enem urysty. Aityńyzshy, myń teńge kóp emes qoi, iə? Əkem qasapshy. Aýyldan poezben et jiberip turdy. Molyraq et qosyp, tamaq istesem enem "etti únemde, etti taýsatyn boldyń" dep aiqailaidy. "Əkem jibergen et" dep aita almadym. Bir etti asap-asap jegiń keledi ǵoi" dep jyly jymidy.
Kelinshektiń júzine zerttei qaradym. Joq, myna kóz - ótirik aitpaityn adamnyń janary. Sosyn minezi ashyq bolǵanymen momyn.
"Kúieýim basymdy jaryp jibergende Astanadaǵy daǵdarys ortalyǵynda boldym. Alty balasy bar əiel de jatty. Bireýdiń ekinshi əieli eken. Əlgi adam balalaryna qol kóteredi eken. Əiel shydai almai qashyp ketipti. Men óz ómirimdi basqalarǵa sabaq bola ma dep aitam. Eneni syilaý kerek, bilem, biraq júkti əiel de qalaǵan tamaǵyn jeý kerek qoi" dedi.
"Astanada qyzym aýyryp aýrýhanaǵa túsip qaldyq. Qasymdaǵy əiel pelmen jep otyrdy. Bir jegim keldi. Esh bolmasa, bir túiir berse dedim. Artymnan eshkim kelmedi. Əjethanaǵa baryp qatty jyladym. Ertesine basqa əiel palatamyzǵa keldi. Enesine aityp, pelmen əkeldirdi. Oi, ómirde jaqsy adamdar kóp qoi. Sol kisini eshqashan umytpaityn shyǵarmyn" dep kúlimsiredi.
Aitpaǵym, bul qyzǵa kim prezident bolady, bəribir. Ol tipti Toqaevtyń kim ekenin bilmeidi.
Sebebi, onyń eńsesin ishki kúizelisi men joqshylyq basyp tastaǵan. Ómirde mundai adamdar qanshama?! Biraq bəribir emes adamdar bar. Biraq olardyń kóbi feisbýkta bir-biriniń etin jep otyrady.
Eń arysy, bir-biriniń pikirine qurmetpen qarai almaidy. Feisbýkta jaqyn tanymaityn adam týraly da "minezdeme" berip jatady ǵoi. Bizdiń qoǵamnyń intellekti kórsetkishin əleýmettik jelidegi pikirlerden-aq kórýge bolady.
Bir belgili redaktor aldyna barǵan adamnyń bəriniń rýyn suraidy eken. Gazetke is-təjiribeden ótýge barǵan stýdent jumys suramasa da, "rýlasym ekensiń, jumysqa alam" depti. Betke ustarlary rýlyq sanadan óspegen bul qoǵamnyń ózgerýine əli kóp jyl kerek...
Irip-shirigen júieniń "irińi" tym tereńge "keýlep" ketti.
Aiagúl Mantaidyń facebook paraqshasynan
