Búgin eldiń basym bóliginde aýa raiy kúrt qubylady. Qazgidromet málimetinshe, Astana men Almaty qalalaryn qosa alǵanda, 16 óńirde daýyldy eskertý jariialanǵan, dep habarlaidy Dalanews.kz.
Birqatar aimaqta úsik, jańbyr men naizaǵai, burshaq, tuman kútilip, jeldiń kúsheiýi yqtimal.
Astanada túngi ýaqytta 1 gradýsqa deiin úsik júredi. Aqmola oblysynda kúndiz batysy men soltústiginde ótkinshi jańbyr jaýyp, naizaǵai oinaidy, al túnde shyǵys bóliginde úsik bolýy múmkin.
Soltústik Qazaqstan oblysynda da jaýyn-shashyn men naizaǵai boljanýda. Tańǵy ýaqytta tuman túsip, jeldiń ekpini kei jerlerde sekýndyna 15–20 metrge deiin jetedi. Óńirdiń batysynda órt qaýpi joǵary deńgeide saqtalady.
Qostanai oblysynda da jańbyr men naizaǵai bolýy múmkin. Pavlodar óńirinde túnde úsik júrip, soltústiginde órt qaýpi saqtalady. Qaraǵandy oblysynyń jekelegen aýdandarynda da úsik boljanyp, jel kúsheiedi.
Shyǵys Qazaqstan men Abai oblystarynda jeldiń ekpini 15–20 m/s deiin jetip, túnde 2–3 gradýsqa deiin úsik júredi. Kei aýdandarda órt qaýpi de joǵary deńgeide saqtalyp otyr.
Al Almaty qalasy men oblysynda, sondai-aq taýly aimaqtarda qar kóshkini qaýpi bar. Sinoptikter Úlken jáne Kishi Almaty ózenderi alabynda (2800 metrden joǵary) qar qabatynyń turaqsyz ekenin eskertip, taý bókterlerine shyqpaýǵa keńes beredi.
Jetisý oblysynda jeldiń ekpini kei tusta 25 m/s deiin jetýi múmkin. Óńirdiń birqatar bóliginde tótenshe órt qaýpi saqtalǵan. Jambyl jáne Túrkistan oblystarynyń taýly aýdandarynda ótkinshi jańbyr, naizaǵai men daýyl kútiledi.
Qyzylorda, Atyraý jáne Aqtóbe oblystarynyń kei bólikterinde órt qaýpi joǵary. Aqtóbe óńirinde budan bólek tuman túsip, túnde úsik júrýi yqtimal.
Mańǵystaý oblysynda kúndiz jańbyr jaýyp, naizaǵai oinaidy, kei jerlerde burshaq túsýi múmkin. Jeldiń ekpini 15–18 m/s deiin kúsheiedi. Al Batys Qazaqstan oblysynda jańbyr, naizaǵai jáne tuman kútilip, jel ekpini 20 m/s deiin jetedi, túnde úsik bolýy yqtimal.
Jalpy, sinoptikter turǵyndarǵa aýa raiynyń qolaisyz qubylystaryna bailanysty saq bolýǵa keńes beredi.
