Túrkistan oblysy Saryaǵash aýdanyndaǵy Keles aýyldyq okrýgine qarasty aýyl turǵyndary Qazaqstan Prezidenti Qasym-Jomart Toqaevqa úndeý jasap, birneshe jyldan beri sheshilmei kele jatqan sý máselesin kóterdi, dep habarlaidy Dala News.
Turǵyndardyń aitýynsha, aýyl halqy uzaq ýaqyttan beri aýyz sýǵa tolyq qol jetkize almai otyr. Olar bul másele jyl saiyn qaitalanatynyn jáne naqty sheshim qabyldanbai kele jatqanyn jetkizdi.
Úndeýde atap ótilgendei, aýyl turǵyndaryna tiesili sý kózderi men infraqurylymǵa qatysty daýlar týyndaǵan. Keibir ýchaskeler jekeniń qolyna ótip ketken, al sonyń saldarynan halyq sý resýrstaryn paidalana almai otyr. Sonymen qatar, turǵyndardyń sózinshe, sýdy bólýge jaýapty tarap túrli sebepterdi alǵa tartyp, sýdy berýdi shektep kelgen.
Qazirgi tańda bul jaǵdai sot qaraýynda ekeni aitylǵan. Alaida «sot sheshimi shyqqansha sý berilmeidi» degen sebeppen aýyl halqy tolyqtai sýsyz qalǵan. Bul óz kezeginde turǵyndardyń kúndelikti ómirine, mal sharýashylyǵyna jáne turmys sapasyna keri áserin tigizip otyr.
Aýyl turǵyndary buǵan deiin de máseleni kóterip, túrli organdarǵa júgingenin, alaida naqty nátije bolmaǵanyn málimdedi. Olardyń aitýynsha, kezinde bul aýmaqta sý máselesi bolmaǵan, burynǵy kolhoz júiesinde halyq sýǵa turaqty túrde qol jetkizip kelgen.
Turǵyndar jaǵdaidyń ýshyǵyp ketkenin aityp, Memleket basshysynan máseleni jeke baqylaýyna alyp, tiisti organdarǵa naqty tapsyrma berýdi jáne aýyldy aýyz sýmen qamtamasyz etý máselesin tez arada sheshýdi surady.
