تۇركىستان وبلىسى سارىاعاش اۋدانىنداعى كەلەس اۋىلدىق وكرۋگىنە قاراستى اۋىل تۇرعىندارى قازاقستان پرەزيدەنتى قاسىم-جومارت توقايەۆقا ۇندەۋ جاساپ، بىرنەشە جىلدان بەرى شەشىلمەي كەلە جاتقان سۋ ماسەلەسىن كوتەردى، دەپ حابارلايدى Dala News.
تۇرعىنداردىڭ ايتۋىنشا، اۋىل حالقى ۇزاق ۋاقىتتان بەرى اۋىز سۋعا تولىق قول جەتكىزە الماي وتىر. ولار بۇل ماسەلە جىل سايىن قايتالاناتىنىن جانە ناقتى شەشىم قابىلدانباي كەلە جاتقانىن جەتكىزدى.
ۇندەۋدە اتاپ وتىلگەندەي، اۋىل تۇرعىندارىنا تيەسىلى سۋ كوزدەرى مەن ينفراقۇرىلىمعا قاتىستى داۋلار تۋىنداعان. كەيبىر ۋچاسكەلەر جەكەنىڭ قولىنا ءوتىپ كەتكەن، ال سونىڭ سالدارىنان حالىق سۋ رەسۋرستارىن پايدالانا الماي وتىر. سونىمەن قاتار، تۇرعىنداردىڭ سوزىنشە، سۋدى بولۋگە جاۋاپتى تاراپ ءتۇرلى سەبەپتەردى العا تارتىپ، سۋدى بەرۋدى شەكتەپ كەلگەن.
قازىرگى تاڭدا بۇل جاعداي سوت قاراۋىندا ەكەنى ايتىلعان. الايدا «سوت شەشىمى شىققانشا سۋ بەرىلمەيدى» دەگەن سەبەپپەن اۋىل حالقى تولىقتاي سۋسىز قالعان. بۇل ءوز كەزەگىندە تۇرعىنداردىڭ كۇندەلىكتى ومىرىنە، مال شارۋاشىلىعىنا جانە تۇرمىس ساپاسىنا كەرى اسەرىن تيگىزىپ وتىر.
اۋىل تۇرعىندارى بۇعان دەيىن دە ماسەلەنى كوتەرىپ، ءتۇرلى ورگاندارعا جۇگىنگەنىن، الايدا ناقتى ناتيجە بولماعانىن مالىمدەدى. ولاردىڭ ايتۋىنشا، كەزىندە بۇل اۋماقتا سۋ ماسەلەسى بولماعان، بۇرىنعى كولحوز جۇيەسىندە حالىق سۋعا تۇراقتى تۇردە قول جەتكىزىپ كەلگەن.
تۇرعىندار جاعدايدىڭ ۋشىعىپ كەتكەنىن ايتىپ، مەملەكەت باسشىسىنان ماسەلەنى جەكە باقىلاۋىنا الىپ، ءتيىستى ورگاندارعا ناقتى تاپسىرما بەرۋدى جانە اۋىلدى اۋىز سۋمەن قامتاماسىز ەتۋ ماسەلەسىن تەز ارادا شەشۋدى سۇرادى.
