Dalanews.kz tilshisimen az-kem áńgime órbitken sarapshy Beijiń basshysynyń sońǵy eki jyldaǵy alǵashqy memlekettik saparyn Qazaqstan bastaýyn qazaq diplomatiiasy úshin úlken mártebe sanaidy.
«2019 jyldyń basynan beri Si myrza Qytaidyń aýmaǵynan shyqqan joq. Indetke qarsy kúresip jatqan halqymen birge boldy. El-jerdi aralap, virýstyń taralýyna sebepker bolǵandy qalamady. Pandemiia báseńdegesin Beijiń álemdegi eń iri investor ekenin eskerip, sońǵy jyldary úzilgen memsapar dástúrin qaita jalǵady.
Qytai basshynyń aldymen Qazaqstanǵa at basyn burýy bizdiń eldiń qanshalyqty mańyzdy áriptes ekenin aiǵaqtaidy. Qytai Orta Aziia elderiniń ishinde Qazaqstannyń potentsialyn joǵary baǵalaidy» deidi sarapshy.
Onyń atap ótkenindei, Beijińniń bizdiń eldiń aýmaqtyq táýelsizdigi men aýmaqtyq tutastyǵyna arasha bolýǵa ýáde etkeni beker emes. Biyl eki eldiń arasyndaǵy diplomatiialyq bailanysqa 30 jyl toldy.
Qytai elitasy osy ýaqyt aralyǵynda qazaq diplomatiiasynyń Beijińdei alpaýyt elmen til tabysa biletin qabiletin moiyndaǵan.
«Si myrza Qazaqstannyń osy baǵyttan taimaǵanyn, osy qalyptan aýmaǵanyn qalaidy. Elimizdiń ekonomikalyq potentsialy, sonyń ishindegi investorǵa degen kózqarasy men qurmeti Batys elderinen kem túspeidi. Qazaqstan qol qoiylǵan qujattyń sońǵy abzatsyna deiingi talapty múltiksiz oryndaityn el.
Al mundai memlekettiń saiasi turaqtylyǵyna da ózge de áriptes elder múddeli bolady», – deidi sarapshy.
Sarapshy Qytai biliginiń Toqaevtyń tusynda qolǵa alynǵan saiasi reformalardy qoldaitynyn aitady. Si Tszinpin Qańtar oqiǵasy men onyń sońy ala kelgen ózgerister jaqsy habardar. Qazaqstan basshylyǵynyń osy oqiǵadan keiingi saiasi-ekonomikalyq bastamalary Qytaimen aradaǵy barys-kelis pen alys-peristiń ekinshi tynysyn asharyna senimdi.
«Beijiń geosaiasattyń san qubylyp turǵanynan qaramastan Qazaqstannyń derbestigi men territoriialyq tutastyǵyna kóldeneń bireýdiń kiligýine jol bermeitinin rastap otyr. Bul biz úshin alǵa qadam basyp, saiasi reformalardy alańsyz júzege asyrýǵa taptyrmas múmkindik. Si Tszinpin osy arqyly teriskeiden tónýi yqtimal qaýip-qaterdi tejep tastady. Sói dei otyra Toqaevtyń Jańa Qazaqstannyń qabyrǵasyn qalaýǵa járdemdesti. Aqorda endigide syrttan tónetin táýekelderge alańdamaidy», – deidi sarapshy.
Káýkenovtiń atap ótkenindei sońǵy jyldary turalap qalǵan eki eldiń arasyndaǵy ortaq jobalarǵa Qytai basshysynyń saparynan jan bitetin bolady. Toqaev bilikke kelgeli Beijiń men Astananyń qarym-qatynasynda turaqtylyq paida bolyp, saýda-sattyq kórsetkishi eselep artqan.
Sarapshynyń málim etkenindei jyl basynan beri qazaq-qytai taýar ainalymy byltyrǵy jylǵy salystyrǵanda 38 paiyzǵa ósken.
«Qytai bizdiń eldiń agroóndirisi men tranport-logistikasyna, IT tehnologiialarǵa, robotty tehnikaǵa, tutastai alǵanda ǵylym men bilimge qarjy quiýǵa yqylas bildirip otyr. Eki el basshysynyń júzdesýinde Qytaiǵa aparatyn shoiyn joldardyń sanyn kóbeitý máselesi sóz boldy. Osy arqyly qazaq biligi Qytai shekarasyndaǵy eki jaqtyń kásipkerlerine de qiyndyq týǵyzyp otyrǵan máseleni birjolata sheshkisi keledi.
Álbette, taraptar tek saýda-sattyq salasymen ǵana shektelip qalmaidy. Toqaev pen Sidiń Qytai men Qazaqstannyń iri qalalarynda mádeni ortalyqtar ashatyn ýaǵdalasty», – deidi Ádil Káýkenov.
