Almatyda ánshi Indira Elemestiń burynǵy kúieýi jáne UQK-niń eks-basshysy Kárim Másimovtiń ákesi Qajymhan Másimovtyń seriktesi bolǵan Kálelhan Imanmádi alty jylǵa sottaldy, dep habarlaidy Dalanews.kz Nege.kz-ke silteme jasap.
Ol Másimovter otbasymen birge «Másimovtiń saýyqtyrý ortalyǵyn» (keiin «Raiana» dep ózgertilgen) basqarǵan. Bul ortalyq meditsinalyq test-jolaqtardy aýrýhanalarǵa jetkizýmen ainalysqan. Imanmádi Másimovtermen birge qoǵamdyq sharalarda jii kórinetin.
Kompozitordy aldaý isi
Is materialdaryna sáikes, alaiaqtyqtyń bir epizody marqum kompozitor Arman Dúisenovke qatysty. 2018 jyly Dúisenov Imanmádige 20 myń fýnt sterling (shamamen 9 mln teńge) bergen. Bul qarajat qyzynyń Londonda oqý men turý aqysyn tóleýge arnalǵan. Imanmádi tólemdi óz ortalyǵy arqyly ótkizýge usynys jasap, «salyqtyq táýekelderdi boldyrmaý úshin» dep túsindirgen. Biraq ýniversitetke aqsha tolyq túspegen.
Imanmádi kompozitor men onyń jubaiyna shottarynyń «ýaqytsha buǵattalǵanyn», al qarajattyń «turyp qalǵanyn» aitqan.
Keiin oqý orny qyzynyń oqýdan shyǵarylatynyn eskertken soń, Dúisenov taǵy tólem jasaýǵa májbúr bolǵan, bul joly da sol adam arqyly. Budan bólek, marqumnyń jubaiynyń aitýynsha, otbasy oǵan kelesi oqý jyly úshin 22 mln teńge, al Túrkiiadan páter alý úshin 37 mln teńge bergen. Jalpy shyǵyn 66,7 mln teńge dep baǵalanǵan.
Sot sheshimi
Sotta Imanmádi óz kinásin moiyndamady. Ol kompozitordan aqsha almaǵanyn aityp, oqýdyń bir bóligin ózi tólegenin jetkizdi. Onyń sózine qaraǵanda, bul eki taraptyń «ózara kómegi» bolǵan, sebebi kompozitor onyń áieline jáne ulyna prodiýserlik etken.
Alaida sot aiyptaýdyń kóp bóligin dáleldenbegen dep tanyp, naqty shyǵyndy 7,3 mln teńge kóleminde anyqtady. Osy somany Imanmádi kompozitordyń jesirine ótep berýge mindetteldi.
