الماتىدا ءانشى ينديرا ەلەمەستىڭ بۇرىنعى كۇيەۋى جانە ۇقك-نىڭ ەكس-باسشىسى كارىم ءماسىموۆتىڭ اكەسى قاجىمحان ءماسىموۆتىڭ سەرىكتەسى بولعان كالەلحان ءيمانمادي التى جىلعا سوتتالدى، دەپ حابارلايدى Dalanews.kz Nege.kz-كە سىلتەمە جاساپ. 

ول ماسىموۆتەر وتباسىمەن بىرگە «ءماسىموۆتىڭ ساۋىقتىرۋ ورتالىعىن» (كەيىن «رايانا» دەپ وزگەرتىلگەن) باسقارعان. بۇل ورتالىق مەديسينالىق تەست-جولاقتاردى اۋرۋحانالارعا جەتكىزۋمەن اينالىسقان. ءيمانمادي ماسىموۆتەرمەن بىرگە قوعامدىق شارالاردا ءجيى كورىنەتىن.

كومپوزيتوردى الداۋ ءىسى

ءىس ماتەريالدارىنا سايكەس، الاياقتىقتىڭ ءبىر ەپيزودى مارقۇم كومپوزيتور ارمان دۇيسەنوۆكە قاتىستى. 2018 جىلى دۇيسەنوۆ يمانماديگە 20 مىڭ فۋنت ستەرلينگ (شامامەن 9 ملن تەڭگە) بەرگەن. بۇل قاراجات قىزىنىڭ لوندوندا وقۋ مەن تۇرۋ اقىسىن تولەۋگە ارنالعان. ءيمانمادي تولەمدى ءوز ورتالىعى ارقىلى وتكىزۋگە ۇسىنىس جاساپ، «سالىقتىق تاۋەكەلدەردى بولدىرماۋ ءۇشىن» دەپ تۇسىندىرگەن. ءبىراق ۋنيۆەرسيتەتكە اقشا تولىق تۇسپەگەن.

ءيمانمادي كومپوزيتور مەن ونىڭ جۇبايىنا شوتتارىنىڭ «ۋاقىتشا بۇعاتتالعانىن»، ال قاراجاتتىڭ «تۇرىپ قالعانىن» ايتقان.

كەيىن وقۋ ورنى قىزىنىڭ وقۋدان شىعارىلاتىنىن ەسكەرتكەن سوڭ، دۇيسەنوۆ تاعى تولەم جاساۋعا ءماجبۇر بولعان، بۇل جولى دا سول ادام ارقىلى. بۇدان بولەك، مارقۇمنىڭ جۇبايىنىڭ ايتۋىنشا، وتباسى وعان كەلەسى وقۋ جىلى ءۇشىن 22 ملن تەڭگە، ال تۇركيادان پاتەر الۋ ءۇشىن 37 ملن تەڭگە بەرگەن. جالپى شىعىن 66،7 ملن تەڭگە دەپ باعالانعان.

سوت شەشىمى

سوتتا ءيمانمادي ءوز كىناسىن مويىندامادى. ول كومپوزيتوردان اقشا الماعانىن ايتىپ، وقۋدىڭ ءبىر بولىگىن ءوزى تولەگەنىن جەتكىزدى. ونىڭ سوزىنە قاراعاندا، بۇل ەكى تاراپتىڭ «ءوزارا كومەگى» بولعان، سەبەبى كومپوزيتور ونىڭ ايەلىنە جانە ۇلىنا پروديۋسەرلىك ەتكەن.

الايدا سوت ايىپتاۋدىڭ كوپ بولىگىن دالەلدەنبەگەن دەپ تانىپ، ناقتى شىعىندى 7،3 ملن تەڭگە كولەمىندە انىقتادى. وسى سومانى ءيمانمادي كومپوزيتوردىڭ جەسىرىنە وتەپ بەرۋگە مىندەتتەلدى.