Qazaqstanda áskerı qyzmetshiler arasyndaǵy óz-ózine qol jumsaý jaǵdaılarynyń aldyn alý úshin arnaıy vedomstvoaralyq baǵdarlama qabyldaý qajet. Mundaı bastamany Senat depýtaty Andreı Lýkın kóterdi, dep habarlaıdy Dalanews.kz.
Senatordyń aıtýynsha, bul máseleni sheshý úshin qoldanystaǵy zańnamany kúsheıtip, áskerı qurylymdar arasyndaǵy ókilettikterdi naqty ajyratý qajet.
"Áskerı polısıa, basshylyq jáne quqyq qorǵaý organdarynyń mindetterin naqtylaý, tártip buzýshylyqtardy tirkeýge arnalǵan sıfrlyq monıtorıń júıesin engizý mańyzdy. Sondaı-aq áskerı bólimnen óz erkimen ketý jaǵdaılary úshin jaýapkershilikti kúsheıtip, qyzmetten “teris sebeppen” bosatý men áleýmettik jeńildikterdi teris paıdalaný máselelerin retteý kerek. Budan bólek, áskerı psıhologtardy daıarlaý men sertıfıkattaýdyń biryńǵaı standarttaryn bekitip, sýısıdtiń aldyn alý boıynsha vedomstvoaralyq baǵdarlama qabyldaǵan jón", - dedi Lýkın.
Ol atap ótkendeı, áskerdegi quqyqtyq tártip pen tárbıelik jumystardyń sapasy zańnamanyń zaman talabyna saı bolýyna tikeleı baılanysty. Qazirgi kezde áskerı polısıa men basshylyq qyzmetin retteıtin birqatar ereje eskirgen jáne sıfrlandyrý men vedomstvoaralyq ózara is-qımyldy tolyq qamtymaıdy. Sonyń saldarynan áli kúnge deıin ásker qatarynda álimjettik, ókilettikti asyra paıdalaný jáne psıhologıalyq daǵdarys jaǵdaılary kezdesip otyr.
"Qoldanylyp jatqan sharalarǵa qaramastan, áskerde júıeli problemalar saqtalyp keledi. Áskerı bólimnen óz betinshe ketý, jarǵyǵa qaıshy qatynastar, jemqorlyq jáne tártip buzýshylyq faktileri azaımaı otyr. Aldyn alý jumystary álsiz, áskerı polısıa, prokýratýra jáne komandovanıe arasyndaǵy ózara is-qımyl tıimsiz. Bul qoldanystaǵy quqyqtyq júıeniń ashyqtyq pen jaýapkershilik qaǵıdattaryn tolyq qamtamasyz ete almaı otyrǵanyn kórsetedi", - dedi senator.
Andreı Lýkınniń pikirinshe, mundaı sharalar tek áskerdegi tártipti nyǵaıtý úshin ǵana emes, sonymen qatar qoǵamnyń Qarýly kúshterge degen senimin arttyryp, ulttyq qaýipsizdikti qamtamasyz etýge de yqpal etedi.
