Kópshilikke Jah Khalib atymen tanymal ánshi Bahtiiar Mamedovtiń Aqtóbe qalasynda josparlanǵan án keshi ótpeitin boldy, dep habarlaidy Dalanews.kz "Tarazy.kz"-ke silteme jasap.
Senimdi derekkózdiń málimetinshe, kontsertti ótkizbeý týraly sheshimdi jergilikti ákimdik habarlaǵan. Sonymen qatar, insaiderlik aqparatqa sáikes, Jah Khalib-tiń Qazaqstan aýmaǵynda josparlanǵan barlyq jeke kontsertteri toqtatylǵan.
32 jastaǵy reper Qazaqstan, Resei jáne TMD elderinde keńinen tanymal. 2022 jyly Resei men Ýkraina arasyndaǵy qaqtyǵys kezinde ol Kievte qalyp qoiǵan. Ánshiniń aitýynsha, jary — ýkrain ultynan. Soǵystyń alǵashqy ailarynda Ýkrainada bolǵan Jah Khalib sol el halqynyń qamqorlyǵyn erekshe atap ótken edi. Osy málimdemelerinen keiin onyń Reseidegi kontsertteri de ótpei qalǵan bolatyn.
Aita keteiik, buǵan deiin túbi ázerbaijandyq reseilik oryndaýshy Akmal-dyń da Qazaqstandaǵy kontsertteri belgisiz sebeppen ótpei qalǵan edi.
