Qazaqstanda áskeri qyzmetshiler arasyndaǵy óz-ózine qol jumsaý jaǵdailarynyń aldyn alý úshin arnaiy vedomstvoaralyq baǵdarlama qabyldaý qajet. Mundai bastamany Senat depýtaty Andrei Lýkin kóterdi, dep habarlaidy Dalanews.kz.
Senatordyń aitýynsha, bul máseleni sheshý úshin qoldanystaǵy zańnamany kúsheitip, áskeri qurylymdar arasyndaǵy ókilettikterdi naqty ajyratý qajet.
"Áskeri politsiia, basshylyq jáne quqyq qorǵaý organdarynyń mindetterin naqtylaý, tártip buzýshylyqtardy tirkeýge arnalǵan tsifrlyq monitoring júiesin engizý mańyzdy. Sondai-aq áskeri bólimnen óz erkimen ketý jaǵdailary úshin jaýapkershilikti kúsheitip, qyzmetten “teris sebeppen” bosatý men áleýmettik jeńildikterdi teris paidalaný máselelerin retteý kerek. Budan bólek, áskeri psihologtardy daiarlaý men sertifikattaýdyń biryńǵai standarttaryn bekitip, sýitsidtiń aldyn alý boiynsha vedomstvoaralyq baǵdarlama qabyldaǵan jón", - dedi Lýkin.
Ol atap ótkendei, áskerdegi quqyqtyq tártip pen tárbielik jumystardyń sapasy zańnamanyń zaman talabyna sai bolýyna tikelei bailanysty. Qazirgi kezde áskeri politsiia men basshylyq qyzmetin retteitin birqatar ereje eskirgen jáne tsifrlandyrý men vedomstvoaralyq ózara is-qimyldy tolyq qamtymaidy. Sonyń saldarynan áli kúnge deiin ásker qatarynda álimjettik, ókilettikti asyra paidalaný jáne psihologiialyq daǵdarys jaǵdailary kezdesip otyr.
"Qoldanylyp jatqan sharalarǵa qaramastan, áskerde júieli problemalar saqtalyp keledi. Áskeri bólimnen óz betinshe ketý, jarǵyǵa qaishy qatynastar, jemqorlyq jáne tártip buzýshylyq faktileri azaimai otyr. Aldyn alý jumystary álsiz, áskeri politsiia, prokýratýra jáne komandovanie arasyndaǵy ózara is-qimyl tiimsiz. Bul qoldanystaǵy quqyqtyq júieniń ashyqtyq pen jaýapkershilik qaǵidattaryn tolyq qamtamasyz ete almai otyrǵanyn kórsetedi", - dedi senator.
Andrei Lýkinniń pikirinshe, mundai sharalar tek áskerdegi tártipti nyǵaitý úshin ǵana emes, sonymen qatar qoǵamnyń Qarýly kúshterge degen senimin arttyryp, ulttyq qaýipsizdikti qamtamasyz etýge de yqpal etedi.
