قازاقستاندا اسكەري قىزمەتشىلەر اراسىنداعى وز-وزىنە قول جۇمساۋ جاعدايلارىنىڭ الدىن الۋ ءۇشىن ارنايى ۆەدومستۆوارالىق باعدارلاما قابىلداۋ قاجەت. مۇنداي باستامانى سەنات دەپۋتاتى اندرەي لۋكين كوتەردى، دەپ حابارلايدى Dalanews.kz.
سەناتوردىڭ ايتۋىنشا، بۇل ماسەلەنى شەشۋ ءۇشىن قولدانىستاعى زاڭنامانى كۇشەيتىپ، اسكەري قۇرىلىمدار اراسىنداعى وكىلەتتىكتەردى ناقتى اجىراتۋ قاجەت.
"اسكەري پوليسيا، باسشىلىق جانە قۇقىق قورعاۋ ورگاندارىنىڭ مىندەتتەرىن ناقتىلاۋ، ءتارتىپ بۇزۋشىلىقتاردى تىركەۋگە ارنالعان سيفرلىق مونيتورينگ جۇيەسىن ەنگىزۋ ماڭىزدى. سونداي-اق اسكەري بولىمنەن ءوز ەركىمەن كەتۋ جاعدايلارى ءۇشىن جاۋاپكەرشىلىكتى كۇشەيتىپ، قىزمەتتەن “تەرىس سەبەپپەن” بوساتۋ مەن الەۋمەتتىك جەڭىلدىكتەردى تەرىس پايدالانۋ ماسەلەلەرىن رەتتەۋ كەرەك. بۇدان بولەك، اسكەري پسيحولوگتاردى دايارلاۋ مەن سەرتيفيكاتتاۋدىڭ ءبىرىڭعاي ستاندارتتارىن بەكىتىپ، ءسۋيسيدتىڭ الدىن الۋ بويىنشا ۆەدومستۆوارالىق باعدارلاما قابىلداعان ءجون"، - دەدى لۋكين.
ول اتاپ وتكەندەي، اسكەردەگى قۇقىقتىق ءتارتىپ پەن تاربيەلىك جۇمىستاردىڭ ساپاسى زاڭنامانىڭ زامان تالابىنا ساي بولۋىنا تىكەلەي بايلانىستى. قازىرگى كەزدە اسكەري پوليسيا مەن باسشىلىق قىزمەتىن رەتتەيتىن ءبىرقاتار ەرەجە ەسكىرگەن جانە سيفرلاندىرۋ مەن ۆەدومستۆوارالىق ءوزارا ءىس-قيمىلدى تولىق قامتىمايدى. سونىڭ سالدارىنان ءالى كۇنگە دەيىن اسكەر قاتارىندا الىمجەتتىك، وكىلەتتىكتى اسىرا پايدالانۋ جانە پسيحولوگيالىق داعدارىس جاعدايلارى كەزدەسىپ وتىر.
"قولدانىلىپ جاتقان شارالارعا قاراماستان، اسكەردە جۇيەلى پروبلەمالار ساقتالىپ كەلەدى. اسكەري بولىمنەن ءوز بەتىنشە كەتۋ، جارعىعا قايشى قاتىناستار، جەمقورلىق جانە ءتارتىپ بۇزۋشىلىق فاكتىلەرى ازايماي وتىر. الدىن الۋ جۇمىستارى ءالسىز، اسكەري پوليسيا، پروكۋراتۋرا جانە كوماندوۆانيە اراسىنداعى ءوزارا ءىس-قيمىل ءتيىمسىز. بۇل قولدانىستاعى قۇقىقتىق جۇيەنىڭ اشىقتىق پەن جاۋاپكەرشىلىك قاعيداتتارىن تولىق قامتاماسىز ەتە الماي وتىرعانىن كورسەتەدى"، - دەدى سەناتور.
اندرەي لۋكيننىڭ پىكىرىنشە، مۇنداي شارالار تەك اسكەردەگى ءتارتىپتى نىعايتۋ ءۇشىن عانا ەمەس، سونىمەن قاتار قوعامنىڭ قارۋلى كۇشتەرگە دەگەن سەنىمىن ارتتىرىپ، ۇلتتىق قاۋىپسىزدىكتى قامتاماسىز ەتۋگە دە ىقپال ەتەدى.
