Almatynyń Áýezov aýdanyndaǵy zańsyz saýda nysandary buzyldy, dep habarlaidy Dalanews.kz.
Almaty qalasynyń Áýezov aýdanynda ruqsatsyz turǵan saýda núktelerin kezeń-kezeńimen súrý jumysy júrgizilip jatyr. Bul týraly aýdan ákimi Abzal Egemberdiev Óńirlik kommýnikatsiialar qyzmetinde habarlady.
Onyń aitýynsha, jyl basynan beri aýdanda 114 beistatsionarlyq saýda nysany men ruqsat qujaty joq 53 silomer (kúsh ólsheý apparaty) buzylǵan. Bul jumys Jer resýrstaryn basqarý departamentimen birlese júzege asqan.
«Demontaj jumystary bastalar aldynda menshik ielerine aýmaqty bosatý qajettigi týraly eskertý hattary jiberiledi. Kóp jaǵdaida kásipkerler eskertýden keiin nysandaryn ózderi alyp tastaidy. Bas tartqan jaǵdaida, arnaýlyqyzmetter olardy májbúrlep buzady», - deidi Abzal Egemberdiev.
Buzylǵan nysandardyń qaita ornatylýyna jol bermeý maqsatynda aýmaqtardy turaqty túrde baqylap, túsindirý jumystary júrip jatyr. Bul is-sharalar olardyń quqyqtyq mádenietin arttyryp, belgilengen tártipti saqtaýyna baǵyttalǵan.
Aýdan ákimdiginiń málimetinshe, bul jumys aýdan aýmaǵynda tártipti, qolailylyq pen qaýipsizdikti qamtamasyz etýge, sondai-aq zańdy biznesti damytý úshin teń jaǵdai jasaýǵa baǵyttalǵan.
