Qazaqstanda qyz alyp qashýǵa qatysty jaza kúsheitildi, dep habarlaidy Dalanews.kz.
16 qyrkúiekten bastap Qylmystyq kodekske jańa 125-1-bap ("Neke qiiýǵa májbúrleý") engizildi. Bul norma boiynsha adamdy erkinen tys nekege turǵyzý nemese birge turý maqsatynda urlaǵany úshin qylmystyq jaýapkershilik qarastyrylady.
Endi mundai áreketter aýyr qylmys retinde saralanady jáne kináliler jeti jylǵa deiin bas bostandyǵynan aiyrylýy múmkin. Al aýyr jaǵdailarda jaza 10 jylǵa deiin ulǵaiady. Buryn jábirlenýshini óz erkimen jibergen jaǵdaida qylmystyq jaýapkershilikten bosatýǵa múmkindik beretin norma alyp tastaldy. Endi jábirlenýshini bosatqanyna qaramastan jaza taǵaiyndalady.
"Jańa ózgerister kúshine engen sátten bastap ishki ister organdarynyń bólinisteri Qaraǵandy, Mańǵystaý, Jambyl, Túrkistan oblystarynda jáne Shymkent qalasynda neke qiiýǵa májbúrleý derekteri boiynsha jeti qylmystyq is qozǵady. Júrgizilgen sharalar nátijesinde 15 adam ustaldy. Árbir is boiynsha sotaldy tergeý júrgizilip, qylmystardyń barlyq mán-jaiy anyqtalyp jatyr. Ishki ister ministrligi azamattardy zorlyq-zombylyq pen nekege májbúrleý jaǵdailaryna beijai qaramaýǵa shaqyrady. Mundai derekter týraly aqparatyńyz bolsa, dereý 102 nómiri arqyly politsiiaǵa habarlasyńyz", - dedi IIM ókili.
