قازاقستاندا قىز الىپ قاشۋعا قاتىستى جازا كۇشەيتىلدى، دەپ حابارلايدى Dalanews.kz.

16 قىركۇيەكتەن باستاپ قىلمىستىق كودەكسكە جاڭا 125-1-باپ ("نەكە قيۋعا ماجبۇرلەۋ") ەنگىزىلدى. بۇل نورما بويىنشا ادامدى ەركىنەن تىس نەكەگە تۇرعىزۋ نەمەسە بىرگە تۇرۋ ماقساتىندا ۇرلاعانى ءۇشىن قىلمىستىق جاۋاپكەرشىلىك قاراستىرىلادى.

ەندى مۇنداي ارەكەتتەر اۋىر قىلمىس رەتىندە سارالانادى جانە كىنالىلەر جەتى جىلعا دەيىن باس بوستاندىعىنان ايىرىلۋى مۇمكىن. ال اۋىر جاعدايلاردا جازا 10 جىلعا دەيىن ۇلعايادى. بۇرىن جابىرلەنۋشىنى ءوز ەركىمەن جىبەرگەن جاعدايدا قىلمىستىق جاۋاپكەرشىلىكتەن بوساتۋعا مۇمكىندىك بەرەتىن نورما الىپ تاستالدى. ەندى جابىرلەنۋشىنى بوساتقانىنا قاراماستان جازا تاعايىندالادى.

"جاڭا وزگەرىستەر كۇشىنە ەنگەن ساتتەن باستاپ ىشكى ىستەر ورگاندارىنىڭ بولىنىستەرى قاراعاندى، ماڭعىستاۋ، جامبىل، تۇركىستان وبلىستارىندا جانە شىمكەنت قالاسىندا نەكە قيۋعا ماجبۇرلەۋ دەرەكتەرى بويىنشا جەتى قىلمىستىق ءىس قوزعادى. جۇرگىزىلگەن شارالار ناتيجەسىندە 15 ادام ۇستالدى. ءاربىر ءىس بويىنشا سوتالدى تەرگەۋ جۇرگىزىلىپ، قىلمىستاردىڭ بارلىق ءمان-جايى انىقتالىپ جاتىر. ىشكى ىستەر مينيسترلىگى ازاماتتاردى زورلىق-زومبىلىق پەن نەكەگە ماجبۇرلەۋ جاعدايلارىنا بەيجاي قاراماۋعا شاقىرادى. مۇنداي دەرەكتەر تۋرالى اقپاراتىڭىز بولسا، دەرەۋ 102 ءنومىرى ارقىلى پوليسياعا حابارلاسىڭىز"، - دەدى ءىىم وكىلى.