Aqmola oblysynda burynǵy jubaiyn óltirýge oqtalǵan er adam 10 jylǵa bas bostandyǵynan aiyryldy, dep habarlaidy Dalanews.kz.
Aqmola oblysynyń qylmystyq ister jónindegi mamandandyrylǵan aýdanaralyq sotynda (QIJMAS) S.-ǵa qatysty burynǵy jubaiyn óltirýge oqtalǵany úshin qylmystyq is qaraldy (QK-niń 24-babynyń 1-bóligi, 99-babynyń 1-bóligi).
Sotta kúieýi as úi pyshaǵyn alyp, burynǵy jubaiynyń jumys ornyna sóilesý maqsatynda kelgeni anyqtaldy.
Sóilesý barysynda janjal týyndaǵan. Áieli dárethana bólmesine ketken kezde, kúieýi onyń artynan baryp, pyshaqpen arqasynan urǵan. Keiin áiel qashyp, basqa bólmege kirgende, kúieýi ony qýyp jetip taǵy da birneshe ret pyshaq suqqan. Syrtqa qashyp shyqqan áielin kóshede taǵy da qýyp jetip, denesine birneshe pyshaq jaraqatyn salǵan. Barlyǵy 9 pyshaq jaraqaty anyqtalǵan.
Kóshede kúieýin kýáger azamattar ustap, politsiia qyzmetkerlerine tapsyrdy.
Sot-meditsinalyq saraptama nátijeleri boiynsha, kúieýiniń esirtkige táýeldi ekeni jáne emdelýdi qajet etetini anyqtaldy.
Sot otyrysynda kúieýi kisi óltirýge oqtalǵanyn moiyndamai, burynǵy jubaiyn tek qorqytpaq bolǵanyn túsindirdi.
Sot úkimi
Sot úkimimen kúieýi 10 jylǵa bas bostandyǵynan aiyrý taǵaiyndaldy, sondai-aq jábirlenýshi dep tanylǵan áieliniń aýrýhanada emdelýine ketken shyǵyndardy óndirý týraly azamattyq talap qanaǵattandyryldy. Budan bólek, sottalýshyǵa jazasyn óteý ornynda esirtkige táýeldilikten májbúrli em taǵaiyndaldy.
Sot úkimi zańdy kúshine engen joq.
