اقمولا وبلىسىندا بۇرىنعى جۇبايىن ولتىرۋگە وقتالعان ەر ادام 10 جىلعا باس بوستاندىعىنان ايىرىلدى، دەپ حابارلايدى Dalanews.kz.

اقمولا وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا (ءقىجماس) س.-عا قاتىستى بۇرىنعى جۇبايىن ولتىرۋگە وقتالعانى ءۇشىن قىلمىستىق ءىس قارالدى (قك-نىڭ 24-بابىنىڭ 1-بولىگى، 99-بابىنىڭ 1-بولىگى).

سوتتا كۇيەۋى اس ءۇي پىشاعىن الىپ، بۇرىنعى جۇبايىنىڭ جۇمىس ورنىنا سويلەسۋ ماقساتىندا كەلگەنى انىقتالدى.

سويلەسۋ بارىسىندا جانجال تۋىنداعان. ايەلى دارەتحانا بولمەسىنە كەتكەن كەزدە، كۇيەۋى ونىڭ ارتىنان بارىپ، پىشاقپەن ارقاسىنان ۇرعان. كەيىن ايەل قاشىپ، باسقا بولمەگە كىرگەندە، كۇيەۋى ونى قۋىپ جەتىپ تاعى دا بىرنەشە رەت پىشاق سۇققان. سىرتقا قاشىپ شىققان ايەلىن كوشەدە تاعى دا قۋىپ جەتىپ، دەنەسىنە بىرنەشە پىشاق جاراقاتىن سالعان. بارلىعى 9 پىشاق جاراقاتى انىقتالعان.

كوشەدە كۇيەۋىن كۋاگەر ازاماتتار ۇستاپ، پوليسيا قىزمەتكەرلەرىنە تاپسىردى.

سوت-مەديسينالىق ساراپتاما ناتيجەلەرى بويىنشا، كۇيەۋىنىڭ ەسىرتكىگە تاۋەلدى ەكەنى جانە ەمدەلۋدى قاجەت ەتەتىنى انىقتالدى.

سوت وتىرىسىندا كۇيەۋى كىسى ولتىرۋگە وقتالعانىن مويىنداماي، بۇرىنعى جۇبايىن تەك قورقىتپاق بولعانىن ءتۇسىندىردى.

سوت ۇكىمى

سوت ۇكىمىمەن كۇيەۋى 10 جىلعا باس بوستاندىعىنان ايىرۋ تاعايىندالدى، سونداي-اق جابىرلەنۋشى دەپ تانىلعان ايەلىنىڭ اۋرۋحانادا ەمدەلۋىنە كەتكەن شىعىنداردى ءوندىرۋ تۋرالى ازاماتتىق تالاپ قاناعاتتاندىرىلدى. بۇدان بولەك، سوتتالۋشىعا جازاسىن وتەۋ ورنىندا ەسىرتكىگە تاۋەلدىلىكتەن ءماجبۇرلى ەم تاعايىندالدى.

سوت ۇكىمى زاڭدى كۇشىنە ەنگەن جوق.